ORANJESTAD (AAN): Nos idioma Papiamento por habri tur porta, tur caminda. Basta nos tribi papia, skirbi y comunica a traves di nos lenga materno Papiamento.
Dialuna, 26 di october 2026, di 6.30 pa 9.00 p.m. lo presenta e biografia di Frank Martinus Arion na Biblioteca Nacional Aruba, George Madurostraat 13, Oranjestad.
Frank Martinus Arion tabata un figura importante den bida cultural di e di dos mita di Siglo 20. Despues cu e buki Dubbelspel (1973) e a bira e cara di literatura Hulandes den nos region.
E buki Dubbelspel, e obra maestro di Frank Martinus Arion a keda filma y ta hiba como titulo Double-play.
Un biaha mas Astrid Britten di Biblioteca Nacional Aruba, Departamento di Cultura Aruba y Gestor Cultural drs. Mirto Laclé a mira e oportunidad pa trece presentacion di un obra literario significativo pa historia y literatura di Caribe pa comparti cu comunidad di Aruba.
For di Hulanda lo ta presente Mineke de Vries, autor di e biografia di Frank Martinus Arion di Corsou.
Titulo di e biografia ta “Uit baldadig hout ben ik gesneden”.
E autor Frank Martinus Arion (1936-2015) tabata un autor reconoci, pero su infancia y hubentud tabata uno bastante dificil. Frank a keda su bida largo cu resentimento y cu sentido di culpabilidad y di berguensa.
‘Mi ta spera cu e historia di su bida lo demostra kico huicio y opresion por haci cu un hende”, Mineke de Vries ta comenta.
Tambe lo tin presentacion di e documental: ‘Frank Martinus Arion: De man, de vrouw, de poëzie’ di cineasta Cindy Kerseborn. Corda cu entrada ta completamente gratis.
