Segun lider di Plataforma Nos Pais, Otmar Oduber:
*Gobierno lo por reduci 17 miyon florin di contribucion na Serlimar
ORANJESTAD (AAN) – E politico Otmar Oduber, ex-minister di Medio Ambiente, Infrastructura y Transporte, den conferencia di prensa a cuestiona Minister Ursell Arends pa loke ta su cartera, na unda Oduber ta haya cu e mandatario aki no a haci net nada, pasobra e no tin maneho y ta un desaster el a haci den tur su carteranan.
“E minister aki no tin maneho riba ningun tereno; mi no ta djis criticando señor Ursell Arends pasobra e ta un minister. Mi ta puntra di con ningun politico ni oposicion tambe no ta lanta bin para banda di Plataforma Nos Pais? Y bisa ‘bo tin razon’. Nos no mester di un ministerio manera esun di Ursell Arends, por ehemplo. E ta un ‘pret packet’ no pasobra e ta un packet sin contenido sino pasobra e no tin maneho, den nada” Oduber a subraya.
El a expresa cu riba medio ambiente no tin maneho; nos grandinan, nos pensionadonan ta bringa lucha, y nada a tuma lugar. El a haci un desaster riba tereno di transporte y pa loke ta trata maneho di desperdicio aki na Aruba.
“Y nos tur sa cu e solucion, e 21 miembronan di Parlamento tin’e na man:
Yama un reunion riba Beleid di Serlimar, lubida cu ta Otmar a present’e; esey ta e dolor. Presenta e ley di Serlimar ta regla dos cos: uno, cu tur hende por wordo cobra e ora ey pa nan desperdicio y sushi, bari di sushi, etc; dos, gobierno ta reduci su contribucion na Serlimar cu 17 miyon florin e ora ey, y cu 17 miyon florin nos por duna Ursell e plan pa su maneho, cu nos a laga atras cinco aña pasa. Cu e 17 miyon florin aki den gobierno, bo ta habri un ‘sanitary landfill’ caminda na un forma corecto, adecua, cu tambe tabata tin destaho publico p’e bo ta cuminza bek cu un dump adecuado na un sitio conveniente, cu nos a reconoce caba na Barcadera. Esaki a wordo regla cinco aña pasa caba cu DIP e tempo ey, y na su turno e ora ey mescos cu nos kier a haci cinco aña pasa, cu por cierto, un comerciante local ta esun cu a sali beneficia cu e destaho publico cu a tuma lugar, lo a comberti e dump di Parkietenbos den un zona di panel di solo”, Otmar Oduber a splica ampliamente.
E compania cu a gana e destaho ta e mesun cu a haci esun na Aeropuerto, cu ta hende cu tin experiencia, tin e modo y e forma pa hacie, segun Oduber. “Pero ainda ketobay, e dump ta e mesun porkeria, y apesar cu minister ta gaña yen di porkeria ta wordo tira keto bay riba dje y no tin ningun solucion”, Lider di Plataforma Nos Pais a remarca.
