Ainda no a yega na un acuerdo
ORANJESTAD (AAN): Diamars mainta den un sala den edificio di Corte, Hues a sigui cu e caso sumario cu Fundacion DUCAPRO a cuminsa contra Q-Waves. Ta asina cu atrobe no a yega na un areglo y Hues a bolbe pospone e caso.
Dia 23 Februari 2024, Hues, despues di a purba negosha cu e partidonan, a pospone e caso pa e partidonan sinta na mes y pa inform’e 24 April 2024 di e resultado.
Ta asina cu e negociacionnan no a resulta y 24 April 2024, abogado mr. Kock di DUCAPRO a pidi Hues pa sigui cu e caso.
E caso sumario cu DUCAPRO a cuminsa contra Q-Waves ta pa Hues prohibi Q-Waves transmiti cancionnan na radio cu tin derecho di autor. Tratamento di e caso riba 23 Februari 2024 a dura bastante caminda Hues a intermedia pa mira si e partidonan lo por sinta na mesa y yega na un palabracion riba e tarifa di pago. E partidonan ta encera tur e radio emisoranan di Aruba y DUCAPRO.
RADIONAN Y DUCAPRO MESTER NEGOCIA
Dia 23 Feburari 2024 durante tratamento di e caso sumario, abogado mr. Sjiem Fat a bisa cu si DUCAPRO kier sinta na mesa pa yega na un areglo di tarifanan, Q-Waves ta dispuesto.
Hues ta haya cu e solucion ta pa e partidonan sinta na mesa pa yega na un solucion. Hues ta haya cu mester sinta na mesa cu tur radio emisoranan. El a puntra si Q-Waves tin un tarifa cu por stipula pa temporalmente, pendiente di e negociacion pa yega na un areglo cu DUCAPRO. Q-Waves a bisa 250 florin pa luna como tarifa simbolico. Mr. Kock no ta di acuerdo cu e tarifa simbolico. E abogado a bisa cu e tarifa ey ta mas abao cu anterior tabatin negosha.
NEGOCIACION TA SIGUI
E promer negociacion a pega y ayera mainta durante tratamento di e caso, e partidonan a trece nan punto di bista pa dilanti. Hues a bolbe intermedia y a bisa cu ta mihor e partidonan bolbe sinta na mesa. Hues a fiha 2 siman pa e partidonan negosha y despues informa si a yega na un acuerdo. Si e biaha aki no yega na un acuerdo por spera cu Hues lo bay tuma un decision.
