Bintidos trahado di KIA a obtene certificado di e metodo 'Youturn”

Minister Rocco Tjon:

ORANJESTAD (AAN): Diabierna merdia, Minister di Husticia y Asuntonan Social sr. Rocco Tjon, tawata presente na Balashi, pa asina haci e entrega di certificado pa 22 trahado di KIA cu a termina e opleiding di “Youturn”, exitosamente.

            “Youturn” ta un metodo cu ta wordo uza den tur instituto coreccional na Hulanda, pa loke ta trata hobennan. Ya pa algun tempo caba, Centro Ortopedagogico Aruba (OC) ta uzando e metodo aki, mirando e exito cu e esaki a demostra di tin di por guia e hobennan mucho mas miho y asina percura pa nan por re-integra y re-socialisa bek den comunidad na un manera exitoso.

            Ta asina cu dentro di poco, KIA ta bay introduci un proyecto piloto caminda ta bay traha cu personal fiho na e seccion di hobennan, caminda lo bay implementa e metodo di “Youturn”, y lo bay brinda miho guia na nos hobennan. Banda di esaki, a aproba diferente cursonan, specificamente pa nos hobennan. Ta trata di un lista grandi caminda ta bay tin mas di shen cupo y opleiding pa detenidonan por participa na diferente cursonan cu tin di haber cu entrepreneurship, enseñansa y mas.

            E mandatario a expresa cu e ta hopi satisfecho di wak e colaboracion entre OC y KIA, caminda e psicologo forensico di OC, hunto cu su ekipo, a percura pa brinda e training aki na e personal di KIA. Un palabra di pabien na henter e personal cu a logra obtene nan certificado. Un inversion den e desaroyo profesional di esnan cu ta labora bou di Ministerio di Husticia y Asuntonan Social ta esun di mas importante. Danki tambe, na e management team di KIA cu a haci esaki posibel den colaboracion cu e ekipo di Centro Ortopedagogico.