ORANJESTAD (AAN): Despues di basta tempo Club Caiquetio ta bay tene su Bingo atrobe y durante un conferencia di prensa Diamars,
PR di e club Andy Farro a splica cu e ta contento cu porfin hende no mester keda cas so pa hunga e Bingo, sino nan por bay na Club Caiquetio pa topa cu bisiña, famia of amigonan.
“Club Caiquetio a haci bastante inversion pa yega te akinan, unda cu entre otro nos tin un mashin ‘state of the art’ nobo nobo, cu tur e facilidadnan pa haci e Bingo un realidad”.
Bo por bin hunga e Bingo na Club Caiquetio, caminda nos ta acepta un maximo di 400 hende na e club, basa riba protocolnan di Crisis Team y DVG, segun Farro.
El a sigui bisa cu ta bay tin mesanan pa tres persona sinta hunto, pero cu suficiente distancia pa bo sinti bo mes safe.
Ta bay tin pantayanan grandi tambe pa wak ora cu e bolanan sali.
Na cas tambe bo por wak tur cos live, unda cu si bo tin Bingo bo ta haya dos minuut pa bo yama y reclama bo premio.
Ta bay tin mas cu 15.000 florin na premio, unda cu e ultimo full card tin un premio di 10.000 florin.
“Una vez cu Club Caiquetio ta cla y tin tur equipo, nos por ofrece na bo organizacion, bo fundacion of bo club un pakete di Bingo cu tur cos den dje, pa abo tambe organiza bo propio Bingo pa recauda fondo”.
Esaki ta inclui carchi di Bingo, Camara, cushina etc., segun Farro.
https://diario.aw/categories/noticia/general/bingo-di-club-caiquetio-cu-mas-di-15-000-florin-na-premio#sigProIdc7e23a353c
