Biblioteca Nacional ta haya un otro obra di artista visual Ephraim Britten pa su coleccion

ORANJESTAD (AAN):  Ephraim R. Britten a namora cu pintamento tempo cu e tabata chikito. Y semper ela sigi siña pa perfecciona su arte y engrandece su conocemento di arte.

Un y tur ta aprecia y adora su obranan. Nan tin un estilo unico, bo ta reconoce un obra Ephraim Britten di biaha.

            Su ultimo proyecto grandi tabata pa Museo Arqeologico Aruba. Un serie di obra cu e historia di Aruba como tema principal.

            Ephraim Britten ta exhibi e cuadra ‘Warawara’ na biblioteca como arte publico. Un obra cu un expresion mistico, esoterico y ingenua. Y un simbolo fuerte, esta e Warawara den composicion. Talbes e Warawara ta trece un mensahe di e mundo spiritual? Un composicion cu ta hiba bo den un otro epoca, un otro realidad y un tempo perdi.

            Ephraim Britten a nace na Aruba, dia 20 di october 1967 y na 1988 Ephraim a exhibi su obranan na Biblioteca Nacional Aruba.

            Na 2004 Britten a tene un exposicion na Instituto di Cultura. Den añanan nobenta Ephraim Britten a pinta diferente imahen pa stampia riba peticion di Post Aruba.