ORANJESTAD (AAN): Biblioteca Nacional Aruba ta ricibi e OCLC ACURIL Award pa
‘Innovative Cooperation Initiatives in the Caribbean’ pa e proyecto/plataforma ‘Coleccion Aruba’. E reconocimento prestigioso aki ta un testimonio di e creatividad y compromiso di e proyecto pa promove cooperacion y innovacion den comunidad.
A entrega e premio na señor drs. Peter Scholing, diahuebs merdia durante e conferencia di ACURIL cu ta tumando luga e siman aki na Corsou.
Door di promove iniciativa innovativo di cooperacion, ta yega na solucion y ta trece un spirito di colaboracion y uzo optimal di recurso di otro cu ta inspira y haci impacto.
Biblioteca Nacional Aruba (BNA) y Archivo Nacional Aruba (ANA) ta e dos institucion di herencia cultural principal na Aruba. Como colaborador di hopi aña den preservacion cultural y accessibilidad, e dos institucion ta compromete pa salvaguardia y comparti e patrimonio documental y audiovisual di e isla.
Nan liderazgo conhunto den transformacion digital, accesso liber y participacion comunitario a haci nan pionero di iniciativa cooperativo den Caribe Hulandes.
