Biblioteca Nacional a drenta den e mundo digital y a pone su studio operacional bek

ORANJESTAD (AAN) – Alexis Tromp, Hefe di Departamento di Media di Biblioteca Nacional Aruba, den entrevista cu DIARIO a duna di conoce cu BNA ta pasando den cambionan cu ta bayendo basta lihe, den cuadro di e Festival di Buki pa Mucha 2021.

 “E epidemia a pone nos den un situacion cu nos mester a haci cambionan pa bay den e era digital. Pa suerte mi tabata presente y a reuni cu e Comision, y nos a dicidi cu bay den e mundo digital, loke no ta facil. Cu locual nos tin den cas nos a pone e studio operacional bek y nos ta logrando esaki, poco poco y nos ta wak cu nos ta bayendo den bon direccion”, Alexis Tromp a menciona.

Den pasado esun encarga mester tabata presente pa logra pero awendia, door cu tin cierto cosnan cu ta sosode door di e epidemia, BNA kier haci tur cos digital, por ehemplo usando e plataforma di YouTube, y ta uza mas e plataformanan di Facebook, y tambe ta uza mas e parti interactivo y e muchanan lo por wak hopi cos via YouTube.

Cu e studio operacional bek e muchanan lo por mira den e programanan, via Facebook, e autornan cu ta wordo graba den e studio di BNA mes. “Den pasado esey no tabata posible, pasobra e studio no tabata operacional”, Tromp a comenta.

Den e studio tin un area unda ta graba e sesionnan di audio y otro area unda ta graba e sesionnan di imagen, Alexis Tromp a indica.

No obstante tin aspectonan cu mester yena ainda, por ehemplo un bon red di internet, tambe falta un par di ekipo so, pa nan por haci mas cosnan posible, pa asina hisa e calidad y servicio di Biblioteca, specialmente pa e Festival di Buki di Mucha.

Alexis Tromp a comenta cu ainda nan ta deliberando pa e publico por haci uso di e facilidadnan aki, door cu Biblioteca ta cay bao di Gobierno pero tampoco mag di gana placa. Y di otro banda Biblioteca no por fungi como un industria di produccion pa hende particular. Den pasado Biblioteca tabata haci hopi trabao pa segundo persona, aworaki, Alexis Tromp a bisa, ta boga pa Biblioteca haci trabao pa su mes, manera market su mes y traha productonan pa scol den e studio mes, tanto educativo como informativo.