Estudionan internacional a revala e berdad cu merece atencion --- *Tin hopi motibo cu cantidad di placa ta bay perdi na remedi --- *For di principio AZV mester a educa Pueblo riba tereno esencial
ORANJESTAD (AAN) — E caracter politico di introduccion di AZV di problemanan cu a sigui manifesta nan mes te awe riba un tereno den cual conocemento di e materia serio aki tabata necesario.
AZV cu a pone un fin na e derecho democratico pa cada hende dicidi riba e calidad di cuido cu e kier, a nace cu e fayo grandi di no tabata producto di un bon planificacion di mundo medico, pero mas bien un forma pa gana voto den campaña electoral.
Loke tambe ta resalta den AVZ ta, cu mientras a centralisa maneho di cuido y a pone bida di tur hende den man di AZV, no a percura pa un team specialisa riba e tereno di maneho di cuido medico cu ta un ramo di conocemento special.
Ora papia di AZV, no ta papia solamente di un organo cu un impacto social, pero ta papia di un organo cu mester conoce e maneho di cuido medico cu tur aspecto cu esaki ta encera den e comunidad di Aruba.
Cuido Medico na Aruba no por wordo compara cu cuido medico na mayoria di paisnan den desaroyo.
E nivel di Cuido Medico, parti di Salud Publico di Aruba, ta haltisimo y e tin su motibo cu ta wordo ratifica pa e forma cu Reino a exigi existencia di SVB na momento cu industrianan a haci nan entrada na islanan Hulandes den Caribe.
Ora a presenta AZV, no a entrega e pakete di responsabilidad cu Gobierno a asumi pa Pueblo, pero e tema politico, cu “tur hende a bira mescos pasobra tur hende ta haya mes cuido medico” loke ta un fabula.
Awe mester introduci solucion y manera nos a splica den edicion anterior, mester permiti Pueblo carga responsabilidad real.
Ora resumi tur loke ta realidad di AZV, nos por mira e parti di ignorancia di responsabilidad den e uzo di remedi cu no ta un problema na Aruba solamente.
Estudionan internacional a wordo haci di e gastonan grandi di remedi cu por baha, si trata na canalisa procesonan cu hende ta comprende e necesidad pa e yuda baha gasto di remedi.
Rapportnan di expertonan mundial, ta papia di e cantidad di remedi cu ta bay perdi.
Na prome lugar ta topa cu e hecho, cu hopi patient no ta comprende cu nan mester bebe tur pildo por ehempel cu dokter a receta.
Demasiado patient ta stop di bebe remedi na momento cu sinti mehoransa y ta bolbe dokter pa otro remedi si nan bolbe haya nan mes confronta cu e problema.
Tin persona cu ni sikiera ta bebe e remedi.
Otro persona, cu of sin rason, ta descubri cu e remedi no ta bay bon, y ta bay dokter pa otro remedi.
Tin hende cu ta acumula remedi, cu por ta sumamente costoso.
Tin un berdad cu ningun hende por desmenti. Un hende cu haya algo gratis, remedi of no, den hopi caso tin e tendencia di no mira e balor di producto pa cual e no a paga. Den asunto di remedi, esaki sigur ta un realidad.
Hopi hende no ta comprende cu un remedi mester wordo produci, transporta, warda mescos cu tur producto cu ta wordo bendi.
Hopi hende no ta comprende cu mester di expertonan pa atende cu remedi.
Den nos educacion anterior nos a splica cu mester di mas informacion na pueblo, cu por yuda baha e gastonan di AZV si e ta na haltura di loke hopi bez e no ta realisa.
Cuido Medico den e situacion despues di Covid-19 lo exigi sumanan importante. Cuido Medico, cu ta centralisa den AZV, mester wordo splica na Pueblo pa asina tur hende colabora den bahamento di gasto, cu ta crea e balansa cu ta evita creacion di mas entrada pa AZV den cobransa di miembronan di comunidad.
