Bevers di Grupo Scout St. Paulus-Michael a ricibi nan ensiña pa proyecto 'Earth Beaver'

ORANJESTAD (AAN): E unidad di kolonie /bevers di Grupo Scout St. Paulus-Michael a cumpli satisfactoriamente cu nan proyecto di Earth Beaver.

E Bevers a participa na cinco siman di informacion y di matanan di nos naturalesa bou guia di sra. Olinda Rasmijn. E Bevers a conoce diferente matanan di Aruba manera: Kwihi, Watapana, Orkidia, di mondi y Huliba. Nan a haya splicacion di e matanan di Shimarucu y Granaatappel di cual nan por a purba un dushi jam traha di esakinan.

Ademas, nan a haya informacion adicional di Aloe, Moringa, Rabo di Cabay, Calbas, Seida y Yerb’i Hole di cual nan mes a traha Pesto di Yerb’i Hole y purba tambe cu cracker. Por ultimo nan a haya e oportunidad pa contribui na nos naturalesa door di plei/ planta cada un varios mata di Mangel canto di laman na Zeewijk.

Na final cada Bever a haya su ensiña di Earth Bever. Nan ta gradici sra. Olinda Rasmijn di StimAruba pa su tempo, contribucion y splicacion na nos muchanan. E grupo kier a informa alavez cu nan ta habri pa tuma miembro nobo entre 5 pa 17 aña, por check nan medionan social.