Minister Rocco Tjon: --- ORANJESTAD (AAN)/WILLEMSTAD - Recientemente, den cuadro di crea structura y fortifica e maneho pa combati corupcion, expertonan di Aruba, Curacao, Sint Maarten, Hulanda y islanan BES a reuni pa asina dialoga riba e tema aki.
E diferente paisnan a wordo representa por medio di expertonan di Ministerio Publico, Ministerio di Husticia, Cuerpo Policial y unidadnan di Inteligencia y Finanzas. E encuentro a wordo inaugura door di Minister President y Minister di Husticia, señor Gilmar Pisas.
Durante e reunion aki a duna un presentacion tocante e desaroyonan actual den cada pais como tambe e instrumentonan huridico cu tin den lugar pa asina mehora e procesonan di e maneho contra criminalidad y e necesidad di un bon cooperacion y comparticion di informacion entre e varios departamentonan.
E proceso pa reduci corupcion por solamente logra resultado a base di un plan integral pa combati esaki. E no ta suficiente pa solamente cana e proceso di investigacion, persecucion y cana e proceso legal den corte, si no tambe mester duna atencion na e parti di maneho y prevencion den e guera contra corupcion.
Tin varios manera pa crea cambionan por medio di un maneho structura, por ehempel; reenforsa e ley y regulacionnan local pa loke ta trata e prolongacion di permisonan, screening di integridad, mas control y supervision.
Ademas di e cambionan aki, por tambe traha riba e maneho di sancion riba por ehempel e ceramento di edificionan cu ta wordo usa pa actividadnan criminal. E colaboracion entre e departamentonan di maneho, polis, husticia y financiero ta esencial, pa asina por organisa e comparticion di informacion. Ademas di e colaboracion entre e departamentonan publico, por bisa cu den e aspecto preventivo, e sector priva lo bin na remarke.
E encuentro aki a wordo organisa danki na e diferente Ministerionan di Asuntonan General, Asuntonan di Reino y Ministerionan di Husticia y Siguridad. E tema aki ta poni den agenda pa e siguiente reunion di “Justitieel VierpartijenOverleg (JVO)” pa e Ministerionan di Husticia, cu lo tuma lugar dia 20 di Januari 2022.
