Segun Oficina Central di Estadistica:
ORANJESTAD (AAN): Oficina Central di Estadistica (CBS) e siman aki a emiti nan relato di CPI Index, y a inclui e calculo di ‘Bestaansminimum’ pa famia.
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.
Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0- 14). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di 2 adulto y dos mucha (edad 0-14).
Na December 2025 e bestaansminimum mensual pa un hogar cu ta consisti di 2 adulto y dos mucha (edad 0-14) (Afl. 5,537) ta mustra un subida di 26 Florin compara cu December 2024 (Afl. 5,511) y a wordo causa principalmente door di subidanan di 27 Florin y 17 Florin den e sectornan di “Vivienda” y “Cuminda y bebida no-alcoholico”. E caida mas grandi na December 2025 a wordo registra den e sector di “Paña y sapato” (Afl. -16).
Na December 2025 e bestaansminimum mensual pa un hogar cu ta consisti di un solo adulto ta Afl. 2,636, cual ta representa un deficit di entrada di Afl 650, un subida di 12 Florin compara cu e deficit observa un aña pasa (Afl. 638). E deficit aki ta e di tres mas halto registra den un periodo di 6 aña pa luna di December.
