Sue-Ann Ras:
ORANJESTAD (AAN): Fundacion Zinnia pa dies aña caba ta treciendo conscientisacion den nos comunidad pa no stuur mientras ta bou influencia di alcohol. Nos ta den temporada di Carnaval na unda cu hende ta sali bebe, y esaki niun hende por kita, pero e mensahe ta ‘No bebe y core auto’.
Segun Sue-Ann Ras di Fundacion Zinnia, ta importante pa pensa riba e consecuencianan cu esaki ta trece cu ne. Hopi biaha e noticia di accidentnan ta pasa den medionan social, pero loke e famia ta keda biba cu ne despues di e accident ningun hende sa. Pa e motibo aki tambe Fundacion Zinnia a keda funda dies aña pasa, despues cu famia di e hoben Zinnia Croes a pasa den e experiencia amargo aki. Nan a lanta e fundacion for di un dolor. Y e deseo ta pa ningun hende pasa den e dolor aki.
Fundacion Zinnia ta sigui cu nan campaña di ‘Supla pa Bida’ y ‘Amigo Didi’. Ta encurasha tur ciudadano cu ta sali y bebe, pa busca nan ‘Breathhalyzer’ na Botica di Servicio of cerca e fundacion mes. “Si bo ta bay bebe, test bo mes prome bo dicidi di bay subi bo auto y ta iresponsabel y core bou di influencia di alcohol”, señora Ras a expresa.
Tambe, señora Ras ta recorda tur ciudadano cu tin pensa di sali y bebe, pa regla bo Amigo Didi of Bo Amigo Responsabel (BAR) prome cu bo sali. “Evita di pasa door di e situacion na unda cu bo por a haci e escogencia diferente. Carnaval ta un periodo di cultura, y hopi biaha nos ta bebe un tiki mas cu nos mester, pero tene cuenta cu tin hende na cas y riba caminda, cu por resulta cu pa resto di nan bida ta keda cu un marca doloroso manera ta e caso di nos di Fundacion Zinnia. E dolor aki nos ta purba di comberti den un movimiento di conscientisacion grandi na Aruba pa otro famia no pasa den e dolor aki”, señora Ras a expresa.
