Accion di trahadornan di Arubus a cuminsa Dialuna cu dos ora

Diahuebs por ta 8 ora y si nada wordo regla por bira welga indefini

ORANJESTAD (AAN)-- Aunke e tabata algo di spera pa varios dia caba, Dialuna mainta pasaheronan di Arubus a wordo sorprendi cu e situacion cu tabata tin paro di labor na Arubus pa 2 ora y 20 minuut mas of menos.

E situacion por sigui escala si no logra un areglo entre Gerencia di Arubus y e personal, incluyendo logicamente e chauffeurnan cu ta un pieza fundamental den e servicio di transporte publico pa pueblo. DIARIO den diferente ocasion a trece dilanti situacion di malcontento cerca e trahadornan di Arubus, y a nota cu e Gerencia mes nunca ta reacciona.

   Den un entrevista corto cu Magaly Brito, Secretario General di Sindicato SEPPA, cu ta representa Arubus, ken a splica cu e motibo pa e accion aki, ta cu nan hopi tempo nan Contrato Laboral ta wordo alarga, pero nada ta sosode. “Ora bo alarga un contrato colectivo sin tene cuenta cu e trahado, e ta bay pone den balansa e compania y tambe e trahadornan nan derechonan. T’asina tambe cu e costo di bida ta pone un peso enorme riba e trahadornan di Arubus, nan ta bay atras y e trabao no ta bira mas facil. Entre otro e situacion den trafico, y e compromiso cu e trahadornan, y e cantidad di pasaheronan cu a aumenta hopi, entre otro, cu ta trece hopi stress y hasta nan ta bira malo.

   E hecho cu no tin interes di e Gerencia di Arubus cu ta hopi pasivo, y e indecision di gobierno, a lanta un bos di protesta” Magaly Brito a duna di conoce.

Si entre dialuna aki cu diamars no tuma un decision pa e trahadornan, a wordo avisa caba cu Diahuebs venidero nan lo drenta den accion di 8 ora, y si nada sosode, nan lo bay den welga, formalmente.

Pero nan  no tin ningun reaccion, ni di gobierno ni di e compania Arubus.

“Naturalmente, ta keda na gobierno y na e compania cu si nan kier evita e cosnan aki nan tin cu yega na un acuerdo. Nan no tin miedo cu cosnan asina ta bira normal na Aruba, y cu e trahadornan ta sigui keda atras, y nan derechonan trapa. E sindicato a acerca Minister Dowers, encarga cu e cartera di transporte publico, y constantemente ta acerca Minister Presidente tambe,  pa intermedia, y el a keda di bay check cu Minister di Finanzasa tambe pa wak si por yega na un acuerdo pero no tin reaccion. E sindicato a haci tur su esfuerzo cu e por a haci pero awo ta cuestion di tin e placa pa yega na acuerdo”, Magaly Brito a señala.

Lamentablemente ni gobierno ni Gerencia di Arubus ta conciente di con importante e servicio di Arubus tin pa cantidad di trahadornan di tur sector na Aruba, tanto di hotel como di otro empresanan, tambe pa nos grandinan cu ta uza e carchi 60 plus, pa e alumnonan di tur scol cu ta biaha cu bus escolar pa bay scol y cas bek, sin kita afo e turistanan cu ta yena Arubus cada bez cu tin crusero mara na waf! Arubus ta genera hopi entrada pa Arubus y pa caha di gobierno, con por ta cu nan no ta haci nada pa e drecha e situacion di e trahadornan cu ta e compania su weso di lomba?