ORANJESTAD (AAN): Den fin di siman, WEB Aruba NV a duna un informacion preliminar di loke a ocasiona e Blackout di Diabierna mainta 10:55 am, cu a afecta henter e isla.
Segun WEB Aruba NV, ta hopi probable cu e blackout di diabierna 27 di januari ultimo ta ocasiona pa un storing den e sistema electrico cu ta proteha e transformadornan di e motornan di planta
RECIP IV. Esaki a resulta for di un investigacion hopi preliminar haci pa WEB Aruba.
E blackout cu a socede prome cu 11’or di Diabierna mainta a dura mas o menos 3 ora y mey prome cu a recupera suministro di coriente completamente pa e isla.
Tanto WEB Aruba como NV Elmar a mantene comunidad na altura di progreso di e recuperacion via medionan social. Un investigacion mas profundo lo mester duna mas claridad tocante causa di e blackout. Aunke e produccion actual ta stabil, lo tin extra vigilacion riba e produccion.
Actualmente ta haciendo testnan como parti di e procedura pa keda optimalisa planta RECIP IV. Segun proceduranan fiho, ta haci e testnan riba e sistema di voltahe halto cu ta proteha e sistema electrico di planta RECIP IV. A surgi un storing den e sistema di proteccion di transformador riba cual dos motor RECIP IV tabata conecta.
E motornan na e momento cu e storing a surgi, tabata den funcion y a perde un montante substancial di coriente, cual finalmente a conduci na un blackout.
WEB ta hopi consciente di e impacto cu interupcion di coriente tin riba bienestar di comunidad y economia di Aruba. P’esey e compania di awa y energia ta ofrece su disculpa y ta gradici pa e comprension.
Riba e potret por mira e CEO di WEB Aruba NV, esta Alfredo Koolman.
