Segun director di HUNTO, Dalgis Montalvo:
ORANJESTAD (AAN)- Director di Stichting HUNTO, señora Dalgis Montalvo, a splica den entrevista cu DIARIO, en conexion cu e tema di vaping y uso di otro substancianan peligroso, bao hopi di nos hobennan, cu tin otro problematica cu e Stichting ta mirando sosode.
HUNTO tambe ta bay haci algo pa e mucha y e hobennan, pa nan mes por vocifera kico ta nan necesidadnan, kico ta e cosnan cu nan ta hayando falta di dje.
“Pa nos di Stichting HUNTO, hopi biaha no ta solamente e parti di salud mental, of e aspecto di adiccion, sino cu ta algo completo.
Awendia, aki na Aruba, no tin un famia cu no a haya su mes den e problematica cu adiccion, of problema di salud mental. E t’asina cerca di nos tur, hasta personanan cu a yega tuma un decision final.
Pues, e ta algo cu ta concerni tur hende y p’esey pa nos ta importante cu no ta keda solamente na nos como organizacion pa haci algo na dje, pero tambe na instancianan. Pesey tambe riba e parti di vaping, pa nos ta importante pa a acerca DVG pa activa e ley di tabaco”, Dalgis Montalvo a señala.
