AVP kier comete golpe di estado contra baluarte di Separacion di Poder
*Ministerio Publico no por entrega Benny un prueba di bon conducta
*Partijraad di AVP no por impone su boluntad politico riba “Strafblad”
ORANJESTAD (AAN) — “Ta hustamente loke awe AVP kier logra den Parlamento ta motibo cu e sistema di Trias Politica a bira base pa gobernacion di Aruba. E separacion di poder mester evita, cu e poder politico den Gobierno of den Parlamento, por dicidi si ta cumpli cu exigencia di Husticia imparcial.”
Palabranan di advertencia serio cu a wordo expresa dor di tur experto legal clave cu DIARIO a acerca, pa presenta na Aruba e peligro grandi cu e estado di derecho di Aruba conoce na e momentonan aki.
“Huez no por drenta Parlamento y dicidi kico Miembronan di Parlamento ta haci. Tampoco Huez no por sinta riba stul di Gobierno. Na mes forma, ningun partido politico of Miembro di Parlamento of di Gobierno, por dicidi kico sentencia di Huez mester ta of cambia e resultadonan di e sentencia,” a bini dilanti.
Constitucion di Aruba ta basa riba separacion di poder, loke ta nifica cu un politico cu a wordo sentencia, ta ricibi e mes trato cu un ciudadano lo a ricibi.
Esaki ta nifica, cu for di momento cu sentencia di Huez resona, e decision aki ta dicidi pa tur loke ley ta regla.
Entre otro e ta nifica, cu e persona cu a wordo castiga pa bay prison, no por ricibi un Certificado di Bon Conducta, loke ta nifica pa cualkier ciudadano cu na su trabou y den su bida priva, e no por entrega e prueba cu el a comporta su mes conforma ley y regla di e pais.
Un “declaracion di bon conducta” ta e prueba cu un Ministerio Publico ta entrega riba peticion di un persona como prueba cu e ta un ciudadano cu no tabata tin problema cu ley.
Pa entrega e “declaracion di bon conducta” Ministerio Publico mester mira si e persona aki tin un asina yama “strafblad” cu ta un lista cu ta haci mencion di actonan castigabel proba dor di Huez, cu el a comete.
Si e persona tin un “strafblad”, Ministerio Publico no por entrega e persona aki un certificado di bon conducta pa entre otro e haya trabou of hasta participa na un organisacion of biba na cierto lugar.
Den e caso di Benny Sevinger, Huez a yega na e conclusion cu e el a comete actonan contra ley, loke ta nifica cu el a haya un “strafblad” cu ningun partido politico ni otro instancia, por pone un banda.
Ley ta exigi pa representantenan di Pueblo di Aruba no a comete un acto cu a conduci na un castigo y cu a haci cu Huez a dicidi cu nan no por ocupa un funcion publico of partipa na un partido politico entre otro, durante cierto periodo.
E registro oficial cu no ta Huez, pero Ministerio Publico cu ta consisti tambe di Polis ta maneha a base di hechos, ta e prueba cu Ministerio Publico a duna pa sigura cu un persona no tin problema pa ehecuta un tarea of funcion den comunidad.
No ta trata aki pues di un funcion politico solamente, cu cual autoridad no por mishi.
Benny Sevinger por a wordo eligi y drenta Parlamento como acusado pasobra Huez no a dicta un sentencia.
Pa el a drenta Parlamento e mester a entrega su credencialnan, papelnan cu ta mustra cu e ta cumpli cu tur e exigencianan pa bira Miembro di Parlamento.
Asina mes, tabata tin obhecion cu un persona cu pa motibo di hasta detencion preventivo a bira dudoso riba tereno di bon comportacion, por a drenta Parlamento.
Debi na e hecho cu e Miembro di Parlamento ta representa e Pueblo directamente y tin derechonan enorme cu ta afecta e pais y ciudadanonan, e exigencia pa un persona drenta Parlamento, ta sumamente halto.
Prome cu un persona wordo acepta den Parlamento, un comision di Parlamento ta repasa su credencialnan, su papelnan personal cu ley ta exigi, cu ta encera tambe cu e tin bon conducta.
E sentencia a scrap bon conducta di Benny Sevinger loke ta haci cu si awor el a wordo eligi pa drenta Parlamento, e no por haci esaki y no por presta huramento pa asina cuminsa traha.
Informantenan ta mustra cu AVP ta intenta un golpe di estado contra e baluarte di Seperacion di Poder, cu ta evita dictadura politico na un pais ya cu e separacion di poder ta evita, cu AVP por uza politica pa kibra un decision di Huez contra Benny Sevinger cu no por drenta Parlamento a base di un sentencia den un caso criminal.
AVP no por exigi pa deshaci di e “strafblad” di Benny cu ta cera porta pa su persona participa den Parlamento!
