King’s Cup Tournament na RCA hopi varia
ORANJESTAD (AAN): Durante un conferencia di prensa convoca na RCA Arena na Solito, e organizacion deportivo aki a lanza oficialmente loke nan ta yama “King’s Cup & Kickball Event”, cu lo ta dianan 26, 27, y 28 di April venidero.
President di SV RCA, esta Jeff Lopez a declara na comienzo, cu desde cu e Directiva nobo aki a sinta, nan a pone diferente meta nan dilanti pa asina hiba e Club aki na e siguiente nivel. Esaki no ta encera djis nan weganan di Futbol y e progreso di esey, y di e compleho, e.o. drechamento di e veld di turf, drecha e cura, y mas proyecto chikito, pa eleva e club y engrandece esaki.
Ademas di esey, na 2024 e organizacion deportivo aki di Solito lo ta festehando nan di 90 aña di existencia y kier bay festeha esey na forma grandi cu tur fanatico y pueblo en general.
RCA su meta ta pa bira Campeon di Futbol e aña aki, y alavez trata di bay competi mas cu otro teamnan den Caribe. Alavez nan kier sigui desaroya hungadornan pa keda logra aun mas.
Posteriormente tesorera di SV RCA y organizadora di King's Cup Soccer Tournament, esta Devin de Veer a splica cu lo tin dos torneo coriendo pareu e dianan di 26, 27, y 28 di April. Uno di nan ta competencia di Kickball cu lo tuma lugar tur tres dia.
Torneo di Futbol dia 27: Segun Devin de Veer, dia 27 di April cuminzando 8:00 am y sigui den oranan di mainta, y planea pa finaliza 11:30 am. Lo tin e torneo di Futbol, dirigi na e Categoria U9 di hobennan. Lo bay tin Liga Plata y Liga Oro, y a ricibi confirmacion di tur team cu a invita.
Den Liga Plata lo bay tin team di Rooi Afo, San Luis Deportivo, SC United, y SV RCA.
Den Liga Oro lo bay tin Dakota, Riverplate, La Fama, y SV RCA.
Esaki ta di dos biaha cu ta organiza e torneo aki. Devin de Veer a corda tur hende cu aña pasa nan a tene pa Categoria U11 unda finalmente e team di Riverplate a titula campeon. Lo tin trofeo pa 1er y 2ndo lugar di Liga Plata, y tambe trofeo pa 1er y 2ndo lugar di Liga Oro.
Torneo di Kickball pa 3 dia: Segun Christer Carlet, nan torneo di King’s Cup Torneo di Kickball, nan tin 8 team confirma caba pa participa. E weganan lo wordo hunga estilo di knock-out round.
Teamnan cu ya caba ta confirma ta Team di KPA Aruba, Team di Kickaholics, StayThaiFit, Total Services, Cuerpo di Bombero, The Gladiators, Douane, Red Machine.
Lo bay tin wega amistoso di Aruba vs. Venezuela, y tambe clasico di Dakota vs. RCA. Tambe Nacional vs. Estrella. Windcreek lo hunga wega amistoso tambe.
Esaki ta prome biaha cu a organiza Kickball pa RCA.
