BBO na frontera lo drenta na vigor dia 1 di Augustus proximo

Minister di Finanzas a informa:

ORANJESTAD (AAN) – Den e simannan cu a pasa Parlamento tabata tin encuentro cu gremio comercial, y tambe cu Departamento di Impuesto y ademas Aduana, cu a brinda splicacion riba e Ley di BBO na frontera, cu a wordo premira pa bin na vigor diasabra 1 di Juli.

            Minister di Finanzas, Xiomara Maduro, den conferencia di prensa a toca e tema aki, y a bisa cu e gremio comercial a trece su puntonan dilanti den Parlamento, y mirando cu gobierno ta contestando preguntanan na Parlamento, a duna mas aclaracion tocante cambionan cu ta wordo presenta.

            Esaki a trece cune cu e Ley di BBO na Frontera lo drenta na vigor dia 1 di Augustus proximo. No por hacie dia 1 di Juli mas, pasobra debate publico mes lo tuma lugar otro siman, entre 4 cu 7 di Juli, y ta premira cu Parlamento lo yama e ora ey na reunion pa asina por debati riba e ley aki.

            E mandatario a splica cu aki tabata tin algun cambio, pa loke ta trata puntonan cu e gremio comercial a trece dilanti, y un di nan ta e definicion di “handelsgoederen” cu ta un tema cu a bin dilanti den combersacionnan cu gremio y tambe e informacionnan cu a wordo duna den e sesionnan informativo.     E mandatario a pasa palabra pa Director di DIMP, Luenne Gomez-Peters pa elabora tocante e esey, locual por lesa den otro articulo.