Barco special di guera Mericano ta bishitando Aruba henter weekend

ORANJESTAD (AAN): Consulado di Merca staciona na Willemstad, a emiti un boletin pa indica cu e dianan aki, Aruba ta hayando un bishita di un barco unico di guera Mericano.

   Ta trata di e barco USNS Burlington (T-EPF-10), cu ta na Aruba entre desde 4 di Augustus, y lo keda te Diadomingo 7 di Augustus pa ‘descansa y recupera’.

   E spearhead-class USNS Burlington ta un barco di transporte rapido uza pa transporta personal of te 600 ton di carga y por opera den circunstancianan dificil.

   A ser splica, cu esaki ta prome biaha cu e barco Spearhead Class ta mara den waf na Aruba. E bishita lo brinda mariniernan di Burlington e oportunidad di experiencia e cultura rico di Aruba.

   USNS Burlington ta den lama Caribe y bao mando di e U.S. Naval Forces South (NavSouth) di cuater flota cu ta apoya e U.S. Southern Command (USSouthCom) y ta combina e operacionnan militar. Militar Mericano ta haci uzo di forsa maritimo den operacion cooperativo di siguridad maritimo pa fortalece control y construi e asociacionnan duradero.

   E operacionnan aki ta mehora e siguridad regional y ta promove paz, stabilidad y prosperidad den Caribe, Sur America y Centro America.