KRALENDIJK: E barco legendario di Greenpeace, esta ‘Arctic Sunrise’ lo mara na e Noordpier na Bonaire for di Diahuebs 20 di April te cu Diahuebs 27 di April venidero.
Nan lo tene Open House pa tur hende subi esaki riba cierto fecha. Tambe lo tin diferente actividad cu lo tuma luga riba y rond di e barco.
Su bishita ta den cuadro di e caso den Corte cu Greenpeace hunto cu habitantenan di e isla ta bay entabla contra Reino Hulandes, pa proteha Bonaire contra cambio di clima. Recientemente Greenpeace a protesta tambe cu e Arctic Sunrise contra minamento den awanan profundo, pa motibo di e daño cu e tipo nobo di minamento akí lo trece kune pa e bida marino.
E Arctic Sunrise y e Rainbow Warrior III ta e barconan di mas grandi y mas conoci di e flota di Greenpeace International. E Arctic Sunrise ta yega Bonaire for di Curaçao, unda a haci trabao di mantencion na e barco.
