Carolina Thiel, Presidente Fundacion Autismo Aruba:
ORANJESTAD (AAN) — Carolina Thiel-Span, Presidente di Fundacion Autismo Aruba, den entrevista cu DIARIO a indica cu e ultimo añanan por wak cu tin un crecemento den e cantidad di personanan (adulto y mucha), cu ta buscando un diagnostico pa Autismo.
El a comenta cu ta dificil pa bisa si e porcentahe di persona a bira mas halto of no, pasobra pa esey mester tin cifranan cu por sigui tur e añanan y Aruba no ta asina leu, den e parti di Salubridad, por ehemplo.
Locual e fundacion ta wak ta cu tin un pregunta mas grandi y esey ta bay man den man cu concientizacion. Si tin un bon campaña di concientizacion, hendenan ta bay haci pregunta por ehemplo na docter di cas of un psicologo pa yega, por ehemplo, na un diagnosis.
E realidad ta birando mas duidelijk y esey ta poniendo presion riba famianan, scolnan y tambe den e area social.
Esey kiermen cu na momento cu tin un diagnostico, locual ta great pasobra e persona tin un contesta riba su pregunta, pero e ta nifica tambe cu bo ta haya un lista di cosnan pa guia cu e mucha of e adulto tin mester di dje.
Esaki ainda no ta full structura na Aruba, y e Fundacion ta purbando di crea e lazonan entre e organizacionnan pa esaki por wordo structura miho.
Diadomingo cu a pasa tabata tin un evento pa mayornan cu a caba di ricibi un diagnostico di Autismo, y esaki e Fundacion a haci hunto cu un psikiatra di mucha, y el a wordo patrocina pa un di e sponsornan mas grandi di e fundacion.
E pregunta a bin for di un psikiatra di mucha tocante cu tin hopi mayor cu ta hayando un diagnostico cu tin pregunta si nan por haci algo hunto? Thiel a bisa cu e idea di un anochi asina ta pa nan por conoce otro, y nan por haya informacion tambe tocante kico e fundacion ta, y por scucha di otro mayornan. Pero mas importante di tur cos ta, cu nan por crea un network entre nan mes, pasobra un hende ta haya sa algo, otro hende sa otro cos, anto e sistema di support aki entre mayornan mes ta hopi importante, pasobra e fundacion ta purbando di wak si esaki por pasa mas.
Carolina Thiel a señala cu e realidad ta cu nan mester di mas servicionan structura. Semper nan ta purba wak si nan por loby, eigenlijk, otro organizacionnan local cu ta provee servicio, unda por pensa riba AZV y gobierno tambe. Aña pasa e fundacion a sinta hopi biaha cu e departamento di mucha y hoben, unda conhuntamente nan a structura un sistema di intervencion trempan den e crèchenan. “Pues nos ta hopi contento cu esaki ta un proyecto cu Fundacion Autismo por a forma parti di dje den su comienzo cu aworaki nos ta wak cu en realidad tin un necesidad grandi di un forma structura, unda data ta wordo colecta y por wordo bisa cu esaki ta un realidad den nos crèchenan por ehemplo, pues, nos ta wak cu tin interes”, Carolina Thiel a señala.
