Banda La Clave Tour 2026 a ranca sali sacudiendo Breda Jazz Festival

Trombonista Larry Hoo di Aruba formando parti

ORANJESTAD (AAN): Informacion for di Hulanda ta indica cu e agrupacion musical ‘Banda La Clave’ su gira na Hulanda “Banda La Clave Tour 2026” a ranca sali den Breda Jazz Festival weekend cu a pasa.

   Banda La Clave ta representa pasion puro, ritmo iresistibel y placer di toca riba nivel halto. De facto ta trata aki di e conocido banda Orquesta Con Clave proclama e miho banda di salsa di Hulanda door di Salsacommunity NL, pero awor den un bachi nobo.  Nan ta awo cu algun musico nobo pero cu experiencia y un concepto nobo e formacion dinamico aki ta toca musica tropical y Afro-Caribense varia bao di direccion di e pianista/producer Sherman Zimmerman. Trombonista di e banda ta e Arubiano residencia na Hulanda, Larry Hoo.

   E gira aki, Banda La Clave Tour 2026, ta bishita diferente ciudad na Hulanda for di Mei te cu September. Diasabra ultimo Banda La Clave a sacudi Breda Jazz Festival. Breda Jazz Festival ta e festival di jazz di 4 dia mas bieu esaki ta funda na aña 1971, y considera esun mas grandi di Europa, y cada aña e ta atrae mas cu 250.000 bishitante.

   Banda La Clave a zona hopi solido compañando e cantantenan Nali Mena, Ruen Capriles y Nando (Riba Dje) Chirino. Nan presentacion a sorprende positivamente cu un nivel hopi halto di salsa, merengue, bachata.  Banda di esey nan a haci un tributo na Corsou y Blue Wave tocando e piesa ‘Mama Wa’ na nan estilo. Tabata tambe un dobbel celebracion: kick-off di e gira y cumpleanos di nan drummer: Gemayel Martha a.k.a. Jimmy, y kende cu apenas 8 aña ya Jimmy tabata subi toca cu Orquesta Con Clave y awor cu e ta adulto e ta haciendo un tremendo trabao riba drums/timbales cu Banda La Clave.

   E siguiente presentacion lo ta dia 30 di Mei riba Africadag Festival na Hilversum. Esaki ta un festival cultural caminda diferente cultura Africano ta wordo mustra, cu arte tematico Africano, musica live, baile, hopi workshop cultural, actividadnan pa mucha y cuminda Africano. Den e show aki e banda lo celebra tambe cumpleaños di nan tremendo bajista: Ashwant Gonesh. Ashwant su bass ta yabi clave den e sonido solido di Banda La Clave. 

   Despues di esaki, e tour lo sigui cu presentacionnan na diferente otro evento, entre otro na Harderwijk Helmond, Almere, Rotterdam y mas. Di momento cu e clave zona, tur cos ta cambia den un gran pista di baile.