Sumamente dificil pa haya camber
ORANJESTAD (AAN): E situacion di camber pa studiantenan di Aruba na Hulanda, ainda tin cierto sector sin solucion awo na 2026. Esey ta loke recien DIARIO a wordo poni na altura di dje.
Tin studiante cu desde 2025 tin di depende di nan famia pa nan bay hospeda den Hotel, y tin biaha haya amigonan cu ta riesga laga nan keda den nan cas of flat, y despues tin di bolbe sali.
Y e ta pone varios studiante bira asina desespera, cu nan tin pensa seriamente di lubida e resto di estudio, y regresa Aruba.
Entre nan tin hasta un di e mihor alumnonan cu a gradua aña na 2024 na Aruba. El a bay Hulanda pa su estudio avanza pero a topa cu un obstaculo grandi, como cu na su stad no por a haya lugar pa keda, ni un camber minusculo.
Na comienzo el a haya lugar pa hospeda cerca amigonan, pero despues e no por a sigui mas. E aña escolar a sigui core, sin cu e tin un camber di su mes.
Famianan na Aruba tambe ta desespera, pasobra dado momento nan a haya nan ta pone nan yiu den un Hotel. E cobranza ey a sali riba di 3.000 Euro pa 10 dia di hospedahe, pues claramente no por a sigui cu esey.
Nan ta inscribi tur caminda pa bin na remarca pa un kamer, pero nada. Nan ta buscando activamente canando den cayanan mira si ta mira borchi di ‘Kamer ter Huur’, pero nada. E dolor di cabez aki ta cuminza afecta e studiantenan cu no por haya mas.
Tambe a haya sa di un otro studiante, kende desde Juli 2025 no tin camber mas, y tambe ta buscando desespera pa uno.
E situacion na Hulanda a cambia grandemente compara cu 11 aña pasa. Y pa e studiantenan di Aruba, e no ta husto como cu nan tin asina hopi animo, y tambe bon punten pa sigui studia, pero nada ainda. Y nan ta sinti cu di Arubahuis ta hayando nada di respaldo, como cu ni un Ministro Plenipotenciario no tin pa yuda defende nan.
“Mi kier sigui studia, pero cu e situacion aki, mi no por sigui asina.” Pues muchanan ta desespera y mayornan ta pidiendo auxilio. Pero nada ainda di solucion, y awor cu schooljaar ta finalizando, algun ta hayando stress atrobe pa bolbe busca camber pa keda.
Tin hendenan ta comenta cu e.o. Gobierno di Corsou si a cumpra compleho di flat na Hulanda special pa yuda nan studiantenan. No ta compronde di con e plan aki nunca a drenta den cabez di gobernantenan di Aruba.
Ban wak con e situacion lo ta pa e siguiente temporada cu studiantenan ta preparando pa bay studia na Hulanda e verano aki.
