Directora di Directie Ouderenzaken Desiree Helder:
ORANJESTAD (AAN): Directie Ouderenzaken ta trahando riba establecimento di un meldpunt special pa denuncia abuso contra adulto mayor. Segun Desiree Helder, directora di Directie Ouderenzaken, e iniciativa aki ta parti di un esfuerso pa crea un proceso mas lihe y transparente pa trata cada señal of denuncia di maltrato.
Pa sostene e meldpunt, Directie Ouderenzaken ta preparando un convenio di cooperacion cu diferente instancia concerni. E meta ta pa cada organizacion ta na haltura di e procesonan y conoce su responsabilidad y sa exactamente con pa actua ora un denuncia drenta.
Den situacionnan urgente, caminda un adulto mayor ta wordo maltrata severamente of tin peligro inmediato, ciudadano mester yama Polis prome. Sinembargo, Directie Ouderenzaken tambe ta disponibel pa ricibi señalnan y denuncia durante ora di oficina.
Mientras e meldpunt oficial ta den fase final di preparacion, ciudadanonan por tuma contacto cu oficina di Directie Ouderenzaken pa comparti informacion of pidi orientacion. Despues di ricibi un denuncia, e caso lo wordo evalua pa determina cua instancia mester interveni pa asina e caso haya su atencion debido.
Ora ta trata di un problema familiar, Directie Ouderenzaken lo envolucra Departamento di Asunto Social (DAS) y lo constata si e ta un caso ya conoci na DAS of no. Si tin indicacion di problema psikiatrico of adiccion, lo tuma contacto cu Respaldo of Stichting Hunto. Den caso di maltrato of posibel delito, lo tuma contacto cu Polis pa nan tuma over y haci investigacion. Si e situacion ta relaciona cu cuido, e departamento ta tuma contact cu IVA kende lo haci e investigacion necesario tambe.
“Tur ta depende di e tipo di caso pa determina cu ken mester tuma contacto. Pero semper berdad nos ta keda den contacto cu e instancianan concerni y lo keda follow up riba con a trata cada caso”, señora Helder a expresa.
Señora Helder a enfatisa cu prioridad semper ta siguridad y bienestar di e adulto mayor. Den caso di maltrato severo, y e adulto mayor no por keda den e cas ey, lo trata esaki como crisis, y Polis lo tuma contacto cu Directie Ouderenzaken cu lo por busca un solucion entre otro un cas di cuido, cerca un familiar of fundacion contra violencia relacional dependiendo di e tipo di caso.
Ora investigacion mustra cu un profesional, gerente of doño ta responsabel pa maltrato, e asunto por sigui via Polis y finalmente Corte lo determina e consecuencia legal, segun e gravedad di e caso.
Directie Ouderenzaken lo keda followup riba cada caso y mantene contacto cu instancianan involucra pa evita cu e persona keda sin apoyo.
