ORANJESTAD (AAN)/Den Haag: Na Rotterdam a tuma lugar awe 27 di maart un encuentro di Banco Central di Aruba (CBA).
E “Ban Topa” aki ta pa brinda informacion na Arubianonan bibando na Hulanda riba oportunidadnan di trabao na Banco Central di Aruba. Presente na e evento aki tabata directora di Gabinete di Aruba Joselin Croes y coordinador di departamento di Bienestar General di Gabinete di Aruba Nuris Dabian.
E merdia a cuminsa cu programa cu diferente presentacion nan unda a bisa e proposito di e Ban Topa aki, cu ta pa conecta cu studiante y profesionalnan hoben; duna un bista cual tipo di funcionnan CBA ta busca y crea oportunidadnan pa networking. Actualmente CBA tin 22 posicion habri unda nan ta busca hende pa yena nan.
Presidente di CBA Jane Semeleer a duna un presentacion riba e CBA como organisacion y operacion di CBA. Señora Semeleer a accentua den su presentacion e scarsedad di personal na Aruba y su efecto grandi pa cu CBA y a haci un apelacion riba e hobennan presente pa considera pa regresa Aruba.
Tambe durante di e presentacion a duna un bista cla riba e condicionnan di trabao na CBA, e beneficionan secundario cu CBA ta brinda y tambe e posibilidadnan pa crece den bo carera profesional na CBA.
Despues di e presentacion e bishitantenan di e “Ban Topa” aki por a intercambia cu funcionarionan di CBA riba posibilidad di un carera profesional na CBA.
E delegacion di CBA – encabesa pa president di CBA Jane Semeleer – ta na Hulanda pa participa pa e bolsa Nationale Carrière Beurs cu lo tuma lugar fin di siman aki na RAI na Amsterdam.
Banda di e “Ban Topa” na Rotterdam, CBA a tene tambe un encuentro similar na Amsterdam.
E potretnan ta cortesia di Arubahuis
https://diario.aw/categories/noticia/general/banco-central-di-aruba-a-tene-ban-topa-na-rotterdam#sigProId105a719088