Banco Central di Aruba a organiza dos evento impactante di ‘Ban Topa’ na Hulanda

ORANJESTAD (AAN): Durante siman, Banco Central di Aruba a organiza dos evento di ‘Ban Topa’,

tanto riba Diaranson 26 di Maart y tambe Diahuebs 27 di Maart na Amsterdam y Rotterdam respectivamente.  Reaccion ricibi awor ta cu tur dos tabata un exito, unda a trece hunto studiantenan y profesionalnan hoben cu tabatin deseo di topa cu gerencia di Banco Central (CBA).

   Como un institucion lider den comunidad Arubano, nan tambe ta wordo impacta pa scarcedad di talento den e mercado di labor.  Pesey pa por atrae talentonan bek pa Aruba, ta importante pa nan duna informacion confiabel encuanto potencial oportunidadnan di trabao na CBA.  Pesey mes e eventonan di ‘Ban Topa’ na Hulanda ta e prome paso den un esfuerzo continuo pa keda conecta cu studiantenan y profesionalnan hoben cu ta bibando den exterior, pa asina keda mantene nan bon informa.  Tambe a discuti tur nan reto y asuntonan, pa asina kizas haya solucion pa nan.

   “Nos tabatin e privilegio di conecta cu cada participante durante e eventonan di ‘Ban Topa’, y a sinti nan entusiasmo pa cera conoci cu nos team, haya sa mas di e rol di CBA, y otro desaroyo importante den comunidad Arubiano.  A comparti informacion riba posibilidad di core stage, vacaturanan actual, beneficionan di empleado, y e proceso di aplica pa empleo.  Nos ta kere fuertemente cu e iniciativa aki ta e comienzo di un biahe hopi necesario, unda ta traha hunto cu demas stakeholder local, pa inspira y atrae graduadonan y profesionalnan trahador pa bin bek Aruba, pa ta parti di e trahadornan local, y na forma di impacto contribui na e bienestar di comunidad Arubiano.”

   Un danki grandi na tur cu a participa den e evento aki, incluyendo e representanetnan di Arubahuis cu a atende e Ban Topa na Rotterdam.