Cambio di Gobierno 2025 ta marca pa e diferencia di herencia entrega
*Bida y bienestar di turista y ciudadano ta decisivo pa economia
*No por bolbe na e nivel di herencia cu Gobierno saliente a ricibi
ORANJESTAD(AAN)—Ora ta papia di un economia, cu ta e base pa asegura bienestar di un pais y su ciudadanonan, e circulacion di placa ta bini dilanti ya cu economia ta e proceso di intercambio di posesion di un comunidad, cu mester cubri necesidad di hende riba tur tereno.
Cada sector di comunidad, ta depende di otro, pero central ta keda e sector cu ta encarga cu bida y bienstar corporal y mental, di e hende cu ta keda te awe e motibo y curazon di economia.
Aruba na un forma special, ora e ta papia di produccion di placa pa cubri necesidad humano, mester pone e sector di Salud Publico, cuido di tur loke ta mishi cu bida hende directamente, central.
Pa economia di Aruba florece, e mester di hende den tur rango cu ta capaz pa crea e union necesario di talentonan y capacidad, pa cubri e necesidad total di su poblacion cu ta productor economico principal di e pais.
Un comunidad ta depende di e trabou y aporte di tur hende pa e por funciona, loke ta nifica cu cada persona cu no ta capaz pa participa na produccion di un pais, ta bira segun leynan social un persona cu comunidad mester cuida.
Pues e garantia di un bon salud ta indispensabel no solamente pa base humano cu den mundo moderno ta bayendo perdi cu velocidad, pero hasta pa produccion personal di placa, cu cada dia ta bira mas importante pa e ser humano cu ta bende hasta su alma den un comunidad mundial dirigi riba materialismo.
Pues Cuido Medico cu ta culmina na momento cu mester interna un patient pa e por ricibi cuido avanza na diferente forma, ta esencial pa e sector productivo di e pais den tur rango.
Hospital pa e poblacion local di Aruba ta esencial pero tin otro funcion sumamente importante tambe si tene cuenta cu e pan di Arubiano, e nivel di bida di e poblacion local, ta depende di e posibilidad di participacion di Arubianonan cu condicion di salud cu ta haci esaki posibel.
Tin varios factor cu Aruba mester tene na cuenta tanto pa su habitantenan mes como su bishitantenan, loke ta haci cu ora papia di cuido medico no por papia di enfermedad so pero mester tene cuenta cu otro aspectonan.
Condicionnan di tempo, cu ta afecta salud di hende. Cambio di clima cu temporaturanan cu tin un grado mas halto pa afecta salud di hende.
E laman cu ta rondona Aruba y cu a wordo crea pa pisca biba y transporta su mes bou awa, ta peligroso pa Aruba y bishitantenan mescos cu e hecho cu aviacion ta basa riba imitacion di parha y originalmente no tabata parti di e habilidad di hende.
E nivel halto di bida na Aruba ta pone hopi hende ignora, e peliger di contagio di malesa cu ta existi na otro partinan di mundo y cu turismo ta yuda drenta Aruba.
Cuido medico ta bira alma di Aruba, cu na 2017 a resulta di ta un berguensa pa e pais, pa motibo di planificacion di Gobierno, cu no a duna ningun indicacion di sentido di responsabilidad.
Na 2017 Aruba mester a sigui atende cu e plan pa renoba hospital a base di sumanan cu na 2020 ya a crea un debe cu a pasa 600 Miyon Florin.
Loke Gobierno anterior di Mike Eman, na 2017 a entrega na Gobierno Evelyn Wever-Croes tabata un drama cu a pone Aruba na careda cu problemanan cu tabata parce relata na extra terestre y un mundo di fantasia.
Un yobida tabata desaster pa e ala nobo di hospital ora pashentnan wordo afecta den nan cama pa yobida.
A resulta cu e dak tabata di asfalt. Candela a start riba dak di hospital y atrobe tur hende na careda. Mudanza di boiler tabata necesario mientras holor di materia peligroso tabata manifesta su mes.
E totalidad di caos mester a wordo atende pa Ministro Dangui Oduber, cu a logra introduci un persona capacita pa asina Aruba awe por tin un hospital reconoci cu hasta ta brinda servicio na su region.
Vigilancia di e maneho cu ta bolbe den mannan cu a laga un caos atras na 2017, door di tur miembro di Parlamento ta sumamente importante mientras mester splica Pueblo cu mas problema, solamente lo aumenta e suma di debenan di cual ya e hospital nobo ta exigi un parti grandi.
Awe un hospital moderno ta wordo entrega na e Gobierno nobo cu tambe ta ricibi un Imsan na San Nicolas, cu por conta cu servicio medico cerca di cas cu aparatonan moderno y cuido di primera.
DIARIO, cu mester a atende for di 2017 cu e herencia desastroso cu Gabinete Wever-Croes a ricibi, lo sigui informa Aruba kico ta e herencia cu awe tya wordo entrega na e gabinete nobo, cu mester percura pa un mentalidad nobo y no e mentalidad di ayera ora 600 Miyon pa un hospital nobo a bira aventura den un mundo di peligro pa bida y salud di Arubianonan y turista cu como ser humano ta alimenta economia, productor di base material di bida pa e poblacion local.
