Juffrouw Lisi Werleman-Paris, director ta detaya:
ORANJESTAD (AAN)- Juffrouw Lisi Werleman- Paris, cabesante di Imelda Kleuterschool, a elabora tocante con e Siman di Salud a tuma lugar den su scol.
Manera ta conoci e tema central tabata “Fortaleza Mental” riba cual a pone enfasis.
E muchanan a habri e siman cu un actividad cada dia, cuminzando Dialuna cu e mayornan.
“E mayornan mester a pinta nan emocion con nan a sinti e mainta ey. Mi mester bisa cu esaki tabata un tarea no facil, bo tabata wak e mayornan grawata nan cabes un tiki, pasobra e no djis pinta un cara, sino con bo ta sinti. E mesun tarea aki, despues e yiuchinan a haci despues den klas.
Diamars, hunto cu e mayornan nan mester a manda nosun video di kico bo por haci pa bo salud mental. Esaki ta entre otro e forma con bo ta come y tambe movecionnan cu nos ta haci, y actividadnan di por ehemplo, hala rosea cu nos ta haci, pa traha riba nos salud mental.
Diaranzon, e muchanan a scucha un storia di Lila, cu ta un mucha cu tin un tiki dificultad pa traha amistad, anto con e ta anda cu esaki y con e ta siña pa crea amigo y deal cu su emocion pa cu esaki. E storia aki maestranan mes a traha.
Diahuebs, cu cooperacion di FADA e muchanan a haya e storia di e Ratoncito, unda nan a wordo splica kico ta bon y malo y con pa tuma decisionnan y para pa bo mes, na momentonan cu bo ta haya bo bao un tiki bao di presion y cu kizas emocionnan por hunga un rol, pero abo tin control di esaki.
Y Diabierna a cera cu un actividad di movecion y tambe di relahacion p’asina e muchanan tambe por siña con pa relaha na momento cu nan sinti nan mes un tiki tenso”, Juffrouw Lisi Werleman-Paris, a relata.
