Ban hunto celebra Dia di Dera Gay den nos barionan

ORANJESTAD (AAN): Riba diaranson 24 di juni 2026 Gobierno di Aruba bou Ministerio di Asunto General,

Naturalesa, Medio Ambiente y Cultura, Comision Celebracion di Dianan Nacional (CCDN) y UNOCA lo uni nan esfuerso pa celebra Dia di San Juan y Dera Gay, un iniciativa cultural cu lo trece e celebracionnan directamente cerca di nos hendenan.

Cu e lema “Ban celebra Dia di Dera Gay den bario” e actividad tin como meta pa promove y fortifica e herencia cultural di Aruba, treciendo e tradicion di San Juan pa e pueblo y creando oportunidad pa participacion directo di grandi y chikito durante e celebracion. Entre 4'or di atardi pa 8'or di anochi, un trailer cultural cu varios representante di Gobierno di Aruba, CCDN y UNOCA, hunto cu varios musico, cantante, bailarin, lo bishita cuminsando na Bushiri Complex, Centro di Bario y Deporte Dakota y Mabon Kavel, culminando cu un gran final pariba di brug na Carnival Village den San Nicolas.

E iniciativa ta nace for di e conviccion cu cultura bo tin cu comparti cu otro. Dera Gay no ta solamente un celebracion, pero un simbolo importante di nos identidad nacional y un tradicion cu ta forma parti di Aruba pa varios generacion caba. Door di trece e celebracion directamente den e bario, e organisadonan ta busca pa fortalece nos orguyo cultural, encurasha participacion di comunidad y mantene e tradicionnan cu ta identifica nos como un pueblo na bida.

Durante e parada, comunidad lo por disfruta di un programa cultural interactivo cu musica, baile, tradicion y competencia tipico di Dia di San Juan. Grupo Masiduri lo ta encarga cu e presentacion di e baile tradicional di San Juan, mientras cu Grupo Cariño lo percura pa animacion musical.

Ademas, publico lo por competi den varios actividad cultural, entre otro

• Bulamento di candela
• Competencia di grito di gay
• Competencia di grito di galiña
• Competencia di e grito mas largo di gay
• Competencia di buscamento di bandera
• Competencia di Dera di Gay

Lo tin diferente premio pa habitantenan cu participa.

Programa di Parada Cultural di Dera Gay

E Celebracion lo tuma luga den un solo parada unda lo para cuater diferente bario.

Prome stop: Bushiri Complex

Di dos stop – Centro di Bario y Deporte Dakota

Di tres stop – Mabon Kavel, caya Butishi

Di cuater y ultimo stop – Carnival Village (Gran Final) San Nicolas

E trailer cultural lo pasa door di diferente districto via diferente camindanan principal di Aruba.

Direccion pa Bushiri Complex

Lo pasa via Rotonde di Paradera → Rotonde di Sero Patrishi → E.J. Watty Vos Blvd. → Rotonde Madiki Kavel → Frankrijkstraat → Bushiri Complex

For di Bushiri Complex direccion Centro di Bario y Deporte Dakota

For di Bushiri Complex → Frankrijkstraat → Rotonde Madiki Kavel→ E.J. Watty Vos Blvd. → Rotonde Codemsa → Caya Betico Croes → Rotonde Tarabana → Dadelstraat → Caya Juancho Kock → Pampunastraat → Centro di Bario y Deporte Dakota

For di Centro di Bario  y Deporte Dakota direccion Mabon Kavel

Centro di Bario y Deporte Dakota → Pampunastraat → Caya Juancho Kock → Dadelstraat → Rotonde Tarabana → Caya G.F. Betico Croes → Rotonde Cumana (ex-CODEMSA) →. → Rotonde di Aeropuerto → Rotonde di Pos Chikito → Savaneta → Cura Cabay → Brazil → Mabon → Caya Butishi → Mabon Kavel

For di Mabon Kavel rumbo Carnival Village

Mabon Kavel → Mabon → Caya Bernadina Growell → Brazil → Wendy's Cura Cabay (T-Weg) → Rotonde di San Nicolas (FTA)→ Bernhardstraat → Carnival Village San Nicolas.

For di San Nicolas pa Paradera

Carnival Village → Bernhardstraat → Rotonde (FTA) San Nicolas → Savaneta → Rotonde Drive Inn → Macuarima → Rotonde Santa Cruz → Piedra Plat → Paradera Gas Station

Tambe ta invita e habitantenan cu ta biba banda riba e ruta pa sali y disfruta di e ambiente cultural mientras cu e trailer cultural ta pasa den nan bario (districto) rumbo pa e siguiente destinacion.

E gran final lo tuma luga na Carnival Village San Nicolas, unda e participantenan y nos pueblo lo topa otro pa conclui un anochi yen di tradicion, musica, alegria y orguyo cultural.

Gobierno di Aruba, CCDN y UNOCA ta invita tur habitante specialmente Bushiri, Dakota, Mabon y tur cu ta riba e ruta pa un y tur participa activamente na e celebracion y forma parti di un experiencia cultural unico cu ta uni tur generacion y ta fortifica nos identidad nacional.

Dera Gay 2026: Cultura den bario, tradicion den curason di nos pueblo.