Vilma Thijsen, Secretaria:
*Seguridad di salud ta ausente na pia di trabao
ORANJESTAD (AAN)-- Vilma Thijsen, Secretaria di Sindicato TOPA, a declara den entrevista cu Matutino DIARIO, cu ta haya lamentable loke e trahadornan ta pasando na DAO (Directie Arbeid en Onderzoek), cu nan salud, na pia di trabao, pasobra ta net nan tin e bureau di ILO (Organizacion Internacional di Labor) aki na Aruba.
“Nan ta representa ILO y ta participando tur aña den e congresonan, pero aki mes por wak con nan situacion ta den nan mesun departamento unda e preocupacion pa seguridad di salud, nan no atende seriamente”, Thijsen a señala.
El a sigui splica cu, bisando e berdad, tin diferente convenio cu mester wordo ratifica y tampoco a wordo haci.
“Nos como Sindicato TOPA, tur aña nos ta participa, pasobra nos ta afilia PSI (Public Services International), y tur aña nos ta wordo punta cu dede, pasobra nan ta bisa cu Aruba no ta ratificando e convenionan, siendo cu tin acuerdonan di parti di salud y seguridad na pia di trabao. Si bo no a ratifica, pero bo tin cu cumple cu ne, manera e ta wordo exigi pa bo haci aki na Aruba, pero nan no ta atende seriamente”, Secretaria di TOPA, Vilma Thijsen a señala.
El a agrega cu na Gobierno mes e ta bayendo for di man pasobra tabata tin un comision cu tabata trahando riba e parti ey, y awo e termino a caba; nan a pidi pa renob’e y Minister no a duna atencion na esey. “TOPA tambe a manda carta pa e Minister encuanto esey, puntrando con ta para cu e comision, si e trabaonan ta sigui, pasobra mester tuma e cosnan aki na serio, pasobra e por perhudica e parti di salud di e trahadornan, y wak aworaki kico ta pasando” Vilma Thijsen a señala.
Thijsen a expresa cu TOPA ta para completamente tras di e trahadornan. “Nos a caba di bin di DIMAS, nos a ripara cu DAO ta cera, tin parti cu nan ta atendiendo e problema, pero ban wak con e resultadonan ta, pasobra nos como TOPA nos tin cu sigui traha riba e parti aki pasobra nos ta para tras si nos trahadornan y seguramente e aspecto di salud di nos trahadornan na pia di trabao, señora Vilma Thijsen, secretaria di TOPA a conclui.
