Awe ainda Aruba no ta na haltura di desastre financiero 2017 --- *Prome cu un eleccion mester tin claridad den realidad di e pais --- *Autoridad independiente mester informa votador prome cu vota
ORANJESTAD (AAN) — “Prome cu un votador haci uzo di su derecho sagrado pa bay vota, e mester ricibi informacion corecto di instancianan independiente cu ta duna Pueblo informacion di e situacion cu e pais ta aden. “
Esaki ta opinion di un experto financiero, informante di DIARIO, cu ta indica cu na Siglo 21, Aruba a haya tur motibo pa percura pa e votador no haci e pais victima di politiconan cu por causa problema serio pa e pais.
Eleccion na Aruba na 2021, a trece dilanti algun punto serio cu ta parce di a bay perdi den olvido, pero cu mester bini dilanti hunto cu e realidad di cierto politiconan cu astucia politico.
Na prome lugar, e experto a indica cu e ta di acuerdo cu DIARIO, cu mescos cu mas hende den comunidad, ta di opinion cu for di awor mester traha riba asuntonan serio cu a bini dilanti den eleccion 2021.
Algo sumamente serio tabata e hecho cu partido AVP a entrega na Huez un copia di un formulario di voto cu a wordo deposita y cu pa ley mester ta secreto. Huez a nenga e copia aki como prueba den sala di Corte y a declara cu e hecho cu un voto a sali den publicidad, ta un delito contra ley.
Nunca mas a tende di e caso aki mescos cu otro asuntonan cu a bini dilanti den e eleccion, den cual manera semper e debatenan a haya hopi atencion.
Sinembargo, segun mas y mas ciudadano ta opina, mester atende cu e informacion oficial cu votadornan ta ricibi ora nan ta bay urna electoral.
Na 2013 y na 2017 esaki a bini claramente dilanti.
E informante di DIARIO a mustra cu na 2013 e cantidad di voto cu e partido di Mike Eman a haya, a subi pasobra Pueblo a wordo convenci pa loke e partido a presenta na Pueblo cu e promocion entre otro di Aruba y naturalesa mientras Aruba ya tabata den situacion desastroso riba tereno financiero.
A wordo mustra riba e talento di Mike Eman pa haci politica loke a stroba Aruba di realisa cu e pais tabata den un situacion asina desastroso, cu na 2014, despues di eleccion, Hulanda mester a pone Aruba bou supervision.
Na 2017, Aruba ya tabata conoci cu e debe nacional pero no tabata na haltura di e desastre financiero total, cu a rementa na 2018, ora tras di otro Aruba a wordo presenta cu e peso di debe nacional, e proyectonan di PPS y e realidad cu Citgo tabata un fantasia.
Manera e experto ta indica, te awe berdad no ta completamente conoci pa Aruba, cu sin asistencia Hulandes awe lo ta un pais cu a zink den un situacion financiero desastroso cu ya tabata realidad for di 2017.
Te awe, Aruba no ta realisa e situacion serio di e pais, cu mester a recupera di e maneho desastroso cu el a conoce.
Segun informantenan na 2017, resultadonan di eleccion lo tabata diferente si Aruba tabata na haltura di e realidad di e pais, cu tabata bancarota,
E solucion ta, pa na un forma institucionalisa, oficial, autoridad independiente riba tereno financiero y economico di Aruba trece informacion pa Aruba.
Cifranan di Aruba mester wordo presenta y resultado di tur loke e Gobierno cu tabata na mando a haci.
Pensamento ta bay den direccion di organonan oficial di e pais, cu por yega na cifranan y informacionnan exacto na Pueblo, cu no ta depende solamente di loke politiconan kier bisa, pero di loke cifra y realidad di e pais ta indica.
DIARIO ta sigui traha riba e asunto aki pa sostene e proceso democratico cu sigur den e situacion mundial nobo, cu tin a peso di e crisis di Ukraine, Aruba por ta bon informa loke ta base di democracia.
