ORANJESTAD (AAN): Durante un conferencia di prensa, Minister Xiomara Maduro a brinda informacion riba Presupuesto 2025 di Pais Aruba.
Presupuesto di un Pais ta e ley di mas importante, pa asina Gobierno por brinda e servicionan necesario y cumpli cu su obligacionnan financiero.
Alabes den caso di Pais Aruba, mester paga e debe y tambe haci e inversionnan necesario. Na e momento aki Aruba tin un Gobierno den transicion, pero gobernacion ta continuacion y pa e motibo aki ta masha importante pa Parlamento trata e ley di mas importante di Pais Aruba.
Presupuesto 2025 ta entrega caba
Minister Maduro a splica cu e Presupuesto 2025 a wordo entrega caba na Parlamento dia 29 di augustus 2024. Pa di tres biaha consecutivo Gobierno a entrega un Presupuesto na tempo y cu un Surplus. E Presupuesto 2025 tabata conta cu un Surplus di 138 miyon florin cu ta di 1.8% di nos GDP
Nota di Cambio
E mandatario a informa cu algun dia pasa Gobierno a entrega un Nota di Cambio na Parlamento, cu ta contene cambionan proponi pa Presupuesto 2025. Esaki ta necesario ya cu e Presupuesto a wordo traha na april 2024, entrega na augustus 2024 y entretanto tabatin varios cambio, entre otro crecemento economico, reduccion di Inkomstenbelasting y tambe otro cambionan tecnico.
Presupuesto 2025 ahusta
E Presupuesto 2025 ahusta cu tur e cambionan tin un resultado financiero di un surplus di 1.9% di Aruba su GDP. Gobierno hunto cu sector colectivo, cu ta instancianan manera SVB, AZV, EPI etc, ta yega na un Surplus di 3.5% GDP. Esaki ta nifica cu apesar a haci e cambio grandi di reduccion den belasting, e caha di Gobierno ta keda cu un Surplus di 140 miyon florin. E resultado financiero aki ta mas miho cu locual a wordo entrega na aña 2024.
Disciplina financiero
Aruba ta e unico pais den nos region cu tin un Presupuesto cu un Surplus. E mandatario ta enfatisa cu esaki ta resultado di un maneho serio y responsabel cu ta e resultado di e trabou duro di profesionalnan Arubiano cu a traha den ekipo. Si e Gobierno nobo sigui cu mesun maneho financiero, Presupuesto di Aruba por sigui conta cu Surplus den e añanan venidero y e debe lo baha te 52% na aña 2029.
Apelacion na Presidente di Parlamento
Na final di e conferencia di prensa, Minister Maduro a haci un apelacion na Presidente di Parlamento pa yama un reunion publico pronto pa asina trata e Presupuesto 2025, y no warda te ora e Gobierno nobo sinta. Si e Gobierno nobo tin otro idea, nan por bin cu un Nota di Cambio y sigui traha. Ta importante pa Parlamento trata e Presupuesto 2025 pa asina Gobierno di Aruba por cumpli cu su necesidadnan financiero manera mester ta, paga debe y tambe haci inversion necesario.
