Thomas Ruiz, secretario di VRA:
*Por papia di entre 20 cu 30 auto pa dia cu ta envolvi den accidente
ORANJESTAD (AAN) – Thomas Ruiz, Secretario di VRA (Verening Rijscholen Aruba), a elabora den entrevista cu DIARIO, tocante e cantidad di accidentenan di auto cu ta tuma lugar tur dia na Aruba.
Ruiz a comenta cu e ta enfatiza mas tanto riba e parti di comunicacion y e ta kere cu a yega ora pa tur e stakeholders sinta hunto y durf di papia riba un tema cu tin biaha hopi hende no gusta, pero cu mester papia di dje pa nan ta riba mesun linea.
Ruiz a subraya cu e cantidad di accidentenan cu ta sosode na Aruba tur dia, ta inaceptabel, esta: mil pa luna! Esaki ta nifica 2 mil y pico auto involucra pa luna, den dalmento. Por papia di entre 20 cu 30 auto pa dia cu ta envolvi den accidente. “E ta inaceptable!” el a reitera.
Thomas Ruiz a remarca cu no ta un hende so na Aruba por trece solucion, pero ta tur esnan cu ta stuur auto den nos pais mester haci algo pa trece un trafico mas sigur.
Ruiz a splica cu VRA tin un semi campaña den prensa y na radio unda nan ta papia tocante esaki, y nan ta hayando reaccion di e publico. Nan ta atende hopi yamada di comunidad. E meta di e campaña aki ta pa concientiza pueblo y e departamentonan concerni.
El a menciona cu Minister di Husticia ta na haltura, pasobra e ta esun cu a lanta e Comision, pero esaki ta un problema gigantesco cu nan mester bay den fase. “Pero mi ta stress mas tanto riba solucionnan practico; no mester warda, por ehemplo, pa e Comision sinta na mesa pa haci cambio. Awo nos ta bin den prensa cu esaki y nos ta spera cu por soluciona e problema mas pronto posible.
