Porfin AZV a cera aña cu un surplus
ORANJESTAD (AAN): Diamars mainta Minister di Turismo y Salud Publico Sr. Dangui Oduber a reuni cu director di Organo Ehecutivo di AZV, ir. Edwin Jacobs pa ricibi e cuenta anual di 2023 di e fondo di AZV. Ta despues di hopi decada AZV ta logra sera su aña cu un surplus cu ta garantisa inversion di miyones di Florin cu lo worde inverti den cuido medico den e proximo añanan nos dilanti.
AZV a indica un aumento di entrada danki na e crecemento impresionante di nos turismo, e fondo di AZV su entradanan na prima y na BAZV a conoce un aumento.
Ademas, AZV a logra financia cierto inversionnan importante den cuido cu a keda posponi pa motibo di pandemia y den Juni 2023 a firma un acuerdo di e zorgakkoord cual un di e temanan ta inversion pa reenforsa e prome liña di cuido. Minister Oduber ta orguyoso di por haci inversionnan den cuido y ta anuncia cu despues di hopi aña a inverti 13,5 miyon Florin cu a keda reparti di e siguiente forma: (*) Hospital 5,1 miyon. (*) ImSan 4,1 miyon. (*) Stichting BOB 1,8 miyon. (*) Respaldo 1,0 miyon. (*) 1,4 miyon den estudio pa e POHnan, plataforma di estudio pa dokternan di cas, desaroyo di Aruba Health app y desaroyo di e cuadro financiero multi anual.
Minister Dangui Oduber ta expresa su satisfaccion pa e recuperacion rapido di e fondo despues di pandemia y e fortificacion cu ta tumando lugar y e compromiso di como ministerio di turismo pa sigui percura pa e entradanan necesario pa e fondo worde inverti pa e mehoracion den e sector di cuido na Aruba. Finalmente, Minister Oduber ta gradici AZV y su team pa e forma diligente di maneha e gastonan y ta expresa cu ta importante pa sigui contribui na e sostenibilidad financiero di e seguro medico, garantisando acceso na cuido di calidad pa nos aseguradonan awe y den futuro.
