ORANJESTAD (AAN): Siman a habri, y a bira conoci cu fraccionnan di PPA y FUTURO a entrega un peticion pa un reunion publico riba e sucedido di siman pasa cu a sacudi comunidad.
Ta referi aki na e persecusion di un auto cu a cuminza di Bubali y finaliza den Madiki Kavel cu consecuencia fatal pa un hoben di 19 aña.
PPA ta boga pa mediante un mocion pone fondonan disponible pa ekipa cuerpo policial cu entre otro “bodycam” pa su miembronan.
E peticion ta papia pa su mes y e meta di e reunion ta pa trece trankilidad y confianza den nos comunidad, asegurando transparencia y objetividad den e investigacion andando, pero tambe haci un maximo esfuerzo pa evita cu algo asina por ripiti su mes.
E carta manda pa President di Parlamento ta indica textualmente: Pa medio di e carta aki, firmantenan, ta solicita un reunion publico cu urgencia pa asina atende e topico cu tin comunidad asina indigna y preocupa den e caso recien unda un hoben di apenas 19 aria e perde su bida den un confrontacion cu cuerpo policial.
E obhetividad y confianza den nos ministerio publico ta worde treci seriamente den duda y no ta contribui na e tranquilidad necesario cu comunidad mester tin den su sistema hudicial imparcial.
Considerando e impacto enorme cu e caso aki tin riba nos comunidad y preocupacion cu a ser crea serca tanto famianan di e victima como tambe den nos comunidad, ta had un peticion pa yama e reunion publico aki cu e meta di trece claridad y trankilidad bek riba entre otro e siguiente puntonan:
(1) Maneho, regla y protocolnan cu ta aplika den caso di un persecucionnan policial.
(2) Maneho, regla y protocolnan pa loke ta e derecho di e ciudadano den caso di un persecucion policial.
(3) Maneho, regla y protocolnan di respet y garantia na e derechonan basico di cualkier ciudadano pa loke ta e proteccion di nan bida y salud.
(4) Maneho, regla y protocol pa cu proteccion di e bida di un miembro di cuerpo policial den nan funcion.
(5) Maneho, regla y protocolnan pa cu e nazorg" otorga na esnan envolvi, particularmente na e famia.
(6) Maneho, regla y protocolnan cu ta garantiza e transparencia y objetividad den investigacionnan relata na casonan asina unda tin victimanan fatal.
(7) Maneho, regla y protocolnan pa cu proteccion di e integridad di nos sistema hudicial y e derecho riba husticia pa tur ciudadano.
Firmantenan ta di opinion cu durante un reunion publico, tanto gobierno, e minister responsabel, como tambe instancianan concerni manera entre otro Cuerpo Policial y Ministerio Publico mester por responsabiliza nan mes pa cu e maneho cu ta worde hiba como tambe aclarea e preocupacionnan cu por ta existi cerca famianan y comunidad den su totalidad. Esaki cu e meta di proteha transparencia y responsabilizacion di gobierno su maneho y protocolnan na comunidad.
