ORANJESTAD (AAN): Director di WEB Aruba NV, Alfredo Koolman a confirma cu e turbina di gas di 23 MW cu semper ta e ‘weso di lomba’ di e compania cu ta genera awa y coriente, ta off-line e dianan aki.
Pues e Blackout a socede net na un mal momento cu e salbabida aki di Aruba no tabata disponible.
Koolman a confirma, cu e Blackout cu a keda registra 9 di Juni 2022 tambe a origina na e planta di RECIP-4 aki. E tempo ey a investiga pa haya sa e origen di dje, y WEB Aruba NV a tuma medida caba pa esey no ripiti mas. E tabata un problema cu e sistema cu ta suministra e motornan cu combustible.
Tin sistemanan cu mester incorpora e proyecto nobo den dje, e sistema di comunicacion pa e sub-sistemanan, y esaki tin di tuma lugar den combinacion.
E hecho cu e Turbina di Gas ta offine, ta debi cu e tin di pasa den su periodo di service! Pero aki algun dia e lo ta bek den servicio, pasobra WEB Aruba NV kier pa e ta como backup den e prome dos siman di September 2022. Pasobra e dos siman aki ta e ‘piek’ di consumo di coriente na Aruba.
Segun Koolman, normalmente ora un fayo socede cu 1 motor RECIP, e no ta suppose di benta henter e isla abao den scuridad. Pasobra nan tin un sistema avanza instala na WEB Aruba NV, cu na momento cu e detecta problema den produccion, e mes ta regul’e den micro-seconde pa evita cu henter e isla cay afo. Pero e sistema tin di incorpora e planta nobo di RECIP-4 ainda. Lamentablemente e sistema automatico ey no tabata obtenible Dialuna marduga. “Net na mal momento el a socede.”
WEB Aruba NV ta mira e sucedido di Dialuna marduga como algo excepcional. E ta cos cu bo por spera ora di haci e transicion.
E ta desmenti cu ta ola di calor, of demasiado uso di coriente a causa e blackout. Ta djis un origen di motor particular di RECIP-4, cu recien a duna WEB contratiempo caba.
