Awor si cachonan no por cana los nan so riba beach

Esnan canando los por wordo captura pa City Inspector

ORANJESTAD (AAN): E ta un discusion cu a cuminza wordo genera for di decada di 1990 caba, ora cu a descubri cu hopi hende ta bay beach cu nan cacho, y e animal ta haci su “necesidad” riba santo blanco, y despues muchanan inocente ta pasa y trapa riba esaki.

   Pero algun tempo pasa, tanto un asina yama ‘beach policy’ y tambe un ley di cacho a wordo implementa na Aruba, y esaki ta prohibi cu animalnan ta cana los unda cu ta.

   Director di DOW, Marlon Croes riba Diahuebs mainta durante un conferencia di prensa na Eagle Beach, a recorda tur hende cu e ley di cacho aki ta mustra cu no por tin cacho ta cana nan so los riba beach.

   Esaki ta algo cu instancianan lo bay traha y coordina mas cerca cu Bureau City Inspector cu tin awor e habilidad pa pasa y colecta e animalnan aki y hiba nan pa Animal Shelter y aki mira si e.o. nan por haya un doño nobo.

   Segun ley, bo por cana riba beach cu un cacho mara na ‘leash’ cu banchi rond di su garganta.  Fuera di esey e doño mester cana tambe cu un saco pa recoge mesora cualkier sushedad cu e animal laga atras debi na necesidad.

   Esaki ta pa tene beach limpi, y evita cu cualkier mucha inocente poco rato despues ta cana trapa pia abao riba e sushi aki, cu tur consecuencia di salud cu e por tin.

   DOW a cuminza pone borchi algun caminda caba pa mustra hende cierto area ya no ta OK pa bin cu mascota, incluyendo e parke di diverticion cu tin awor net na e Linear Park panort di Costa Linda Beach Resort na Eagle.