ORANJESTAD (AAN): Prijs di gasolin Unleaded a subi siman pasa cu 30 cent pa liter. Durante un conferencia di prensa, Ministro mr. Geoffrey Wever a bisa cu Aruba no ta produci practicamente ningun producto aki petrolero riba e isla,
pues pesey mester cumpra riba mercado internacional basa riba e prijs internacional na momento di compra. E prijs pa Gasolin, Diesel y Kerosin ta na US$ cent pa gallon y ta worde calcula diariamente door di S&P Global’s Platts’s US Marketscan.
Mundialmente, e pandemia y ultimamente, e guerra na Ucraina a crea un presion inmenso ariba prijs di cuminda y energia. Data ta mustra cu e prijsnan den luna di maart 2022 ta +34% mas halto compara cu luna di januari 2022. Un desaroyo cu ta refleha e subida drastico di prijs di petroleo y su impacto riba prijsnan di productonan petrolero. E presion aki pa Aruba como un isla chikito ta dificil pa absorba.
Prijsnan di gasolin, diesel y kerosin vigente desde awe 13 april 2022 ta worde calcula a base di e promedio di e postings over di luna di maart 2022. E posting ta worde refleha den cent dollar pa gallon. Usando conversion pa Florin, gastonan bancario y conversion di galon pa liter, ta calcula e base pa mercado local riba cual ta añadi margenan fiho di ganashi, gastonan di transporte y seguro, accijns y BBO/BAZV/BAVP.
Minister Wever a propone un ahustacion di e structura di prijs na colegio di supervision financiero CAft pa aprobacion. Pa loke ta trata e posibilidad di subsidia, of absorba un parti di e subida di prijs di gasolin, a base di diferente calculacion. Mirando cu ainda Aruba ta depende di sosten di liquidez di Hulanda, conseho di CAft ta importante riba e tema aki.
