Situacion mundial actual ta e reto mas grandi di derecho di expresion
- Cuanto inocente ta muri awe y periodismo mundial ta ignora?
- Prensa mester analisa y legalmente splica loke ta alcansa Pueblo
ORANJESTAD (AAN): E trabou di periodismo a nace for di e derecho di expresion, cu no tabata basa riba e haltura di salarionan cu por gana y importancia social di periodista, pero ariba e defensa di hende y mundo na prome lugar.
Ora papia di derecho di informacion, e calidad y motibo di informacion ta bini dilanti sigur na un mundo cu a conoce progreso y ta entrega periodismo diariamente mas arma pa por defende e valor di e ser humano debidamente.
Si mira atras den ultimo decadanan, por tuma nota con periodismo cu tecnologia moderno a ricibi tur loke e mester, pa lanta para y defende e bienestar di hende, di bida humano, na prome lugar.
Si antes buskeda di informacion tabata mara na actividadnan y trabou cu tabata exigi lo maximo den investigacion y produccion di informacion, awe periodismo por haci uzo di e avancenan moderno cu directamente ta entrega e periodista e informacion cu e mester pa e por sigui amplia y sigui traha na interes di hende, si e kier yama su mes periodista.
Awe mundo a drenta un etapa cu ta exigi di periodismo pa defende bida di hende den tur fase.
E prome teritorio cu mester di defensa di periodismo na Aruba ta Aruba mes y tur Arubiano.
E periodista tin e deber pa sigura cu e tin conocemento amplio di leynan local y internacional, cu ta regla e bienestar di e ser humano di momento cu e nace te e momento cu e muri.
E periodista mester conoce historia di mundo y di un pais, pa e por stipula con e ta sirbi e interes pa medio di informacion cu ta den su man.
Di e forma aki e periodista ta garantisa imparcialidad di prensa cu no ta basa riba e pensamento falso cu tur hende por uza prensa pa sirbi nan proposito.
DIARIO awe por mira Pueblo di Aruba den su cara pa e forma cu DIARIO continuamente a bati y ta sigui bati alarma cu informacionnan concreto encuanto desaroyonan mundial, cu ta mishi cu e bienestar basico di e Arubiano manera historia di Aruba a demostra y manera leynan di e pais a atende pa asina preveni ripiticion pero tambe situacionnan nobo cu ta pone bienestar di Aruba na prueba.
Kico periodistanan mes ta aspira pa Aruba y pa mundo? Esaki mester bini dilanti awe mas cu nunca den e splicacion cu ta duna Aruba di e loke ta pasa den un mundo, cu a bira un poz di dolor pa e ser humano.
Awe periodismo mundial mester protesta e sufrimento di muchanan inocente cu ta wordo mata na dozijn den gueranan cruel cu no ta haya e atencion cu e merece.
E situacion mundial actual ta afecta turismo. Mester bay tras di pantaya pa informa Pueblo debidamente pa e comunidad ahusta su mes loke ta tuma tempo.
Periodismo ta hunga un papel central como informador imparcial y liber di Pueblo na tur momento.
E hende na Aruba ta bini na prome lugar den un mundo cu ta lubida cu hende tin balor manera gueranan desastroso na Ukraine y na Medio Oriente, claramente ta demostra.
Cada hende cu muri ta un hende. Cada hende cu sufri, ta un hende, pa cual periodismo cu tur e hermentnan grandi na su disposicion, tin deber di defende.
Periodismo continuamente mester duna prueba cu e ta vigila leynan basico di Aruba mescos cu e sistema democratico di e pais, cu e mester conoce pa asina asegura cu gobernacion di e pais ta basa riba buskeda di e bienestar di cada ser humano y no elevacion di hende den puesto y cu placa di Pueblo di e pais.
Awe informacionnan di periodismo mester bay profundamente den tur loke ta mishi cu Aruba y lanta para contra e forma cu hende ta dehumanisa y ta perde su valor den un guera den cual produccion di arma ta bira e mihor negoshi mundial.
Den e relacion den Reino por mira con e necesidad di armamento ta afecta e sumanan cu tin na Hulanda y den Reino, pa bienestar di e ser humano cu financieramente ta wordo perhudica door di e necesidad di arma pa su defensa.
E situacion actual mundial y local ta un reto pa periodismo, cu no a wordo introduci pa crea un gremio cu informacion di Pueblo ta haci importante, pero pa asegura cu bon informacion ta duna contenido na e importancia di bienestar di Pueblo.
Awe pa prensa sirbi su derecho di existencia, e mester ta e voz internacional for di cada pais, cu ta lanta para contra destruccion di hende mientras negoshi di arma y guera ta produci placa.
Prensa mester exigi un masterplan basico con Aruba ta proteha den tur sentido, con Arubiano lo bolbe for di exterior!
Prensa mester halza su voz y cu pruebanan historico y investigacionnan profundo, protesta contra e perdida di balor di hende, cu prensa mester defende na prome lugar!
Finalmente ta keda un hecho cu Prensa mudo no ta prensa liber!
