Alex Cybul di VacationAruba.com:
- Tin critica riba e forma cu Gobierno kier introduci registramento
- Tin hopi falta di comunicacion y participacion di e sector
ORANJESTAD (AAN): Alex Cybul di VacationAruba.com ta di acuerdo cu regulacion di e industria di Airbnb, pero ta critica e manera cu Gobierno di Aruba kier introduci e sistema di registracion. Den un entrevista cu DIARIO, el a señala cu falta comunicacion, claridad y participacion di esnan cu tin experiencia den e sector, tanto local como internacional.
Segun Cybul, durante un reunion via Zoom cu mas di 200 host di Aruba y exterior, cu participacion di Airbnb y otro canalnan di huur vacacional, representantenan di Airbnb a indica cu nan no tabata na haltura di e plan di Gobierno. El a agrega cu, segun loke nan a expresa den e reunion, esaki tabata e prome biaha cu nan a tende di un registracion asina cu no tin claridad.
Un di su preocupacionnan principal ta e falta di claridad tocante loke lo sucede despues di e registracion. Cybul a remarca cu doñonan no sa cua exigencianan lo sigui ni con esakinan lo afecta e continuidad di nan negoshi. Segun e, e incertidumbre aki ta haci dificil pa nan sinti nan completamente comodo cu e plan presenta.
No obstante, Cybul ta considera cu Gobierno ainda tin tempo pa aclaria e plan y haci e ahustenan necesario. El a remarca cu hopi di e preocupacionnan actual por a wordo evita si Gobierno a envolve e sector desde e comienso. “Envolve e channels, pasobra e experiencia tey”, el a expresa.
Den e sentido aki, el a recomenda pa Aruba probecha di e experiencia di e canalnan internacional y studia cua medidanan a funciona den otro destinacion y cua no. Esaki lo permiti identifica e elementonan cu a duna bon resultado y adapta nan na e realidad di Aruba.
Cybul a enfatisa cu e sector mester bon regulacion. Segun e, e industria di aki a crece considerablemente na Aruba, creando mas di mil cupo di trabao y generando oportunidad pa hopi hende cu ta brinda servicio den e sector.
“Nos kier pa tur hende cumpli cu reglanan. Pero, envolve nos. Nos ta dispuesto pa yuda. Nos tin experiencia local. Nos tin contactonan internacional”, el a declara.
El a conclui cu pa siete aña caba e ta pidi regulacion pa e industria, pero cu esaki mester tuma forma mediante un proceso bon prepara, cu claridad y participacion di e sector, no na e manera cu Gobierno a present’e.
