Dependencia di Aruba di economia mundial ta sigui exigi alerta nacional
*Mundo enfrente crisis solamente surpasa na 2009 y entrada Covid-19
*Amenaza mundial actual pa Aruba similar na raiz necesidad pa BBO
ORANJESTAD (AAN) — Pa Aruba lo no ta dificil comprende kico ta spera mundo si na nivel internacional no atende cu e peligro grandi cu falta di crecemento economico ta nifica hasta pa e cartera di ciudadanonan rond mundo.
Na entrada di Siglo 21, DIARIO a bati alarma pa Aruba pa e situacion mundial cu a presenta y lo a crece pa bira un amenaza mundial y pa Aruba tambe.
Pa Aruba vigilancia financiero tabata sumamente importante, na momento cu manera historia finaniero di Aruba ta indica, e hipotecanan cu a wordo duna despues di Status Aparte pa proyectonan turistico, a crea un emergencia financiero nobo.
E debenan di e pais mester a wordo paga na momento cu na 2008 oficialmente un crisis financiero mundial a bati na porta di henter mundo.
Origen di e problema tabata na Merca, proyectonan financia pa construccion di cas, a crea un situacion cu a rementa ora prijs di cas a baha na Merca, pues afectando balor di e inversionnan y e forma cu placa a circula.
Aruba dependiente di economia Americano, sigur a sinti e resultadonan di e crash financiero, cu a drenta historia como recesion di 2008 y cu a exigi medidanan internacional cu Aruba mester a incorpora den su programa di maneho financiero na momento cu mester a atende cu e debe di hipoteca tambe.
Ora papia di placa di un pais democratico, ta papia di placa di belasting di Pueblo y placa di belasting produci dor di actividad comercial.
Pues e situacion mundial a topa cu e aumento di peso financiero pa Aruba, cu a dicidi pa pa bini cu e formula di belasting indirecto pa medio di un revision e tempo di sistema di belasting den cual parti di belasting directo a baha y a introduci BBO.
Pa Reino Hulandes e situacion tabata hopi dificil, pasobra Reino Hulandes no por a sigui sostene mas peso cu Pueblo Hulandes mes mester a paga na Hulanda pero tambe gastonan amplio di Reino den cuadro di entre otro fin di Antia Hulandes na 2010.
Awe e impacto financiero cu a produci introduccion di BBO, ta wordo poni den mes linea cu e impacto di Covid-19 y ta wordo menciona dor di Banco Mundial (World Bank), cu ta adverti mundo pa un amenaza pa cual DIARIO na hopi occasion a adverti Aruba, cu ta e resultado cu desaroyonan mundial actual lo trece cune.
E desaroyonan mundial actual cu DIARIO pa hopi tempo ta cualifica como instabililidad peligroso a bira motibo pa Banco Mundial, mara na e conocido International Monetary Fund, IMF, baha su cifranan di expectativa di crecemento economico di Merca pa 1.4 porciento y e crecemento economico mundial pa 2.3 porciento.
Esaki ta nifica cu loke economia mundial den un situacion di incertidumbre marca pa guera y cantidad di problemanan lo a produci pa mundo, lo no ta e caso mas.
DIARIO ta den contacto directo cu informantenan for di algun dia pasa ora a bira eminente cu e situacion mundial ta empeora cu pasonan importante y cu Aruba mester ta prepara.
E caida di crecemento mundial pa Aruba ta tuma lugar despues cu Aruba rapidamente a sabi di recupera di Covid-19 y tensionnan pa loke por a bira e recesion di 2022 pero no a bira.
Sinembargo, awor Banco Mundial ta bati alarma pa e economia mundial, cu por resulta den problemanan serio cu ta haci cu Banco Mundial ta referi na e Recesion di 2008 pa 2010 pero tambe na e situacion despues di Covid, cu ta e unico situacionnan cu por wordo compara cu e amenaza actual.
Di e forma aki e advertencianan di DIARIO pa e situacion mundial cu ta desaroya na e momentonan aki cu temporada di horcan ta anuncia su yegada cu un ola tropical den Caribe y ta exigi preparacion pa otro peligro, ta ricibi legitimidad mientras DIARIO ta sigui tur desaroyo mundial di acerca pa tene Aruba bon informa!
