ORANJESTAD (AAN): Un tema cu ta riba mesa awor cu hopi hende a vacuna contra Covid-19 ta esun relaciona cu e entrada di personanan na Aruba cu si a haya nan vacuna.
Ta confirma cu entrante diamars awor, e residentenan cu s vacuna no lo mester haci un PCR Test ora di viaha y drenta Aruba bek. Pero cual ta e procedura pa loke ta e bishitantenan cu tambe a vacuna.
Relaciona cu esaki, Minister di Turismo, Dangui Oduber a splica cu ainda e protocol ta sigui cu apesar cu e bishitante a haya nan di dos shot di e vacuna, nan tin cu haci e PCR Test pa por drenta Aruba.
El a laga sa cu ya caba na Merca, CDC cu ta e DVG di Merca, a haci un investigacion y a wordo proba caba cu ora un persona haya su di dos vacuna, no por transmiti e virus of contagia un persona. "Esaki sigur ta un 'breakthrough', un noticia sumamente alentador pasobra esaki ta pone cu na Aruba tambe nos por cuminsa evalua si nos ta bay mantene haci test pa turista ora nan a haya nan di dos vacuna y si nos ta bay mantene tambe e seguro obligatorio pasobra esey tambe por ta algo cu ta stroba cu e turista no ta yega Aruba", a bisa.
A demostra cu e turista no tin mucho problema cu e seguro, ni e test pasobra ya caba ta yegando casi 80% di recuperacion di e turismo den comparacion cu aña 2019, cual tabata tin un 'performance' hopi grandi.
E mandatario a remarca cu e beneficio di mas grandi cu un turista tin na Aruba ta cu Aruba ta relativamente habri. E turista por sinti liber pa bay tur establecimento cual ta habri te 11 pm. Na otro paisnan na mundo ainda tin toque de queda, ainda tin orario di ciere mas tempran.
E incentivo di mas grandi cu por ofrece na e turista den su opinion como minister di salud y turismo ta un pais caminda turista por sinti su mes sigur cu e contagionan ta hopi abao, e situacion na hospital ta manehabel y cu nan por move rond cu tur trankilidad manera semper nan a haci na Aruba, Oduber a enfatisa.
Aruba ta wordo considera como un di e destinacionnan di mas 'safe', no solamente pa loke ta crimen, pero pa loke ta e grado di vacunacion, Minister Oduber a finalisa bisando.
