“Awe ta un dia pa Aruba celebra un democracia bibo cu nos ta biba aden"

Dangui Oduber, #2 riba lista di MEP

ORANJESTAD (AAN) – Dangui Oduber, #2 riba lista di Partido Movimento Electoral di Pueblo (MEP), a deposita su voto, na Centro di Bario Playa Pabao, pa 2.30’or di atardi.

E tabata “meymey di su pueblo” manera el a expresa, pasobra un cantidad grandi di seguidornan a bin sosten’e,  p’asina nan celebra democracia.

            “Awe ta un dia pa Aruba celebra un democracia bibo cu nos ta biba aden y nos ta experiencia awe, cu miles di seguidor hunto cu mi den Madiki, loke ta muestra cu awenochi ta bay tin sorpresa den Madiki tambe”, Oduber a acentua.

            El a comenta cu partido MEP a traha duro, 29 candidato hunto cu nan lider, pa nan por gana eleccion y marca historia como e unico partido, cu ta bay goberna Aruba pa tres periodo consecutivo.

            “Mi ta sinti hopi optimista y positivo. Mi ta hopi contento awe, pa eherce mi derecho.  Nos prioridad number 1 ta mehora e poder di compra y baha e costo di bida. Awo cu tin espacio financiero y e situacion a mehora, pa gobierno awo ta nos turno pa nos duna bek na comunidad, na e empresarionan chikito pa mehora calidad di bida, pa e siguiente eleccion”, Dangui Oduber a remarca.

            Por a mira presencia di ex Prome Minister Nelson Oduber y Sra. Glenda Oduber, kendenan a acudi na Centro di Bario Playa Pabao pa duna sosten na nan yiu homber.