ORANJESTAD (AAN): E relato cu Parokia di Paradera a suministra DIARIO e siman aki, y publica Diahuebs, tabata uno incorecto.
Pastor Toti a confirma na DIARIO, cu awe Diabierna 1 di Maart 2024 ta ultimo dia pa inscribi na Parokia di Paradera pa celebra Sacramento di Confirmacion November 2024.
En conexion cu esaki e lesnan di preparacion pa e sacramento aki ta bay cuminsa pronto. Esaki ta conta pa e hobennan di klas 6 di Maria Goretti College, Colegio Pastoor Kranwinkel y pa hobennan cu no ta bay scol di Paradera, pero cu ta pertenece na Parokia di Paradera.
Mayornan tene bon cuenta cu e fechanan di inscripcion tabata e siman aki, y lo finalisa awe Diabierna 1 di Maart. Por inscribi di 5:30 pm te cu 6:30 pm na Pastorie di Paradera.
Sea asina bon di trece copia di e certificado di Bautismo y di prome Santa Comunion. Sin e papelnan aki no por inscribi e hoben.
Tambe bin cu e nomber completo di madrina of padrino. Madrina of padrino mes mester ta batisa, ricibi y confirma.
Dia di inscripcion mester haci un deposito di 50 Florin. E suma aki ta encera gastonan di les y un curso cu e hoben tin cu asisti. Ademas e hoben mester tin bijbel pa asisti na les.
