Parlamentario Misha Raymond, fraccion RAIZ:
ORANJESTAD (AAN) – Misha Raymond, Parlamentario pa fraccion di RAIZ, den entrevista cu DIARIO a duna di conoce cu for di entrante awe 1 di Maart 2024, ta drenta na vigor e servicio di Fisioterapista pa Mucha, locual ta un logro inmenso.
Misha Raymond a relata cu for di e Presupuesto 2024, asina cu Parlamento a haya e concepto di ley, el a haci pregunta na e Minister di Salud Publico tocante “Kinder Physiotherapy”, ya cu Fisioterapia ta wordo cubri den e pakete basico di AZV, pero no tin specializacion pa mucha den dje. E Minister a contesta cu pa Januari e lo a contrata un Fisioterapista pa Mucha den e pakete di AZV pero mirando cu esaki no a tuma lugar na Januari, el a manda pregunta na Februari pa e haya update di e status di esaki.
Dia 22 di Februari, AZV tabata den e sala di comision pa presenta nan maneho financiero di e aña, y den e ocasion aki Misha a bolbe haci e pregunta, con a para cu e Fisioterapista pa Mucha cu mester a wordo contrata na Januari.
AZV a duna di conoce cu pa 1 di Maart, kiermen Diabierna awo e lo drenta na vigor, unda cu muchanan cu tin necesidad special encuanto nan desaroyo motorico, nan movecion, malesanan cu por impedi nan desaroyo motorico, manera mester ta, nan ta bay haya fisioterapia den e pakete basico.
“Mi a haya confirmacion cu e contrato ta firma, dus 1 di Maart (awe) por haci uso di e specializacion di Kinder Physiotherapy den e pakete basico di AZV.
Esaki ta un logro inmenso pasobra for di principio mi a bin ta boga pa e cuido integral di nos muchanan y esaki ta un area den esaki. Logopedie tambe nos tin’e tambe desde aña pasa cu el a drenta na vigor. Ainda no tin un acuerdo pero mi a haya sa di AZV cu pronto lo yega na un acuerdo cu e logopedistanan”, E parlamentario a indica.
El a subraya cu ta importante pa Aruba cumpli cu locual ta stipula den e Tratado di Derechonan di Mucha, pasobra desde 17 Januari 2001, Aruba ta participe den e Tratado aki. “Y nos mester yena tur e buraconan cu tin pa loke ta Derechonan di Mucha”, el a reitera.
El a reitera cu e ta masha contento y e ta spera cu e discusion lo sigui manera mester ta, y e ta sigur cu tanten e ta den Parlamento e lo sigui.
Misha a agrega cu te aworaki cu e sa, tin un mucha muher Arubiano cu a studia profesion aki y tin tur calificacion pa por eherce e trabao y te ainda cu e sa un contrato a wordo firma.
