Awe ta exactamente 95 aniversario di existencia di Camara di Comercio

Nan lo tin treat awe...

ORANJESTAD (AAN): Awe Dialuna, esta 8 di September 2025, Camara di Comercio di Aruba ta bay observa oficialmente nan di 95 aña di existencia.  Esaki ta 95 aña di sirbi, sostene, conecta, y empoderando negoshinan na e isla.

   Tur cos a cuminza dia 11 di November 1929, ora cu un grupo visionario di 30 empresario a haci peticion na Gezaghebber di Aruba pa establece un organizacion cu lo representa y proteha interesnan di negoshi.  E iniciativa aki a conduci cu oficiamente a forma Kamer van Koophandel riba e fecha 8 September 1930, via decreto gubernamental.

   Desde cu el a wordo funda, KvK tabata na curazon di e desaroyo economico di e isla, suministrando guia, defende, y recurso na empresarionan y companianan di tur tamaño.

   Durante casi un siglo, Camara di Comercio a evoluciona hunto cu e panorama empresarial dinamico di Aruba, promoviendo e inovacion, fomentando colaboracion y fortalece e lazonan entre sector priva, Gobierno, y comunidad.  Nan mision semper a keda firme: Crea un ambiente unda negoshinan por prospera y contribui na e prosperidad di e isla.

   Awe cu nan ta celebra nan di 95 aniversario, nan ta reflexiona riba e logronan di pasado y ta mira dilanti pa un futuro yena di oportunidad, crecimento, y compromiso continuo cu excelencia.  E etapa aki no ta djis un celebracion di nan historia, sino tambe un testimonio di e resiliencia, vision, y dedicacion di nan cliente y socionan.

   Recientemente tur e ex-Presidentnan di Camara di Comercio di Aruba a reuni pa asina KvK por a presenta nan progreso y nan vision pa 2025.  E tabata un sesion dinamico, yena di idea balioso, cu feedback yena cu experiencia, y ideanan inspirador.

   E intercambio di conocemento y perspectivanan a reafirma KvK su compromiso di duna forma na un sector di negoshi mas fuerte pa e añanan nos dilanti.

   Pa e fecha special di awe di 95 aña, Camara di Comercio ta pidi cliente y amigonan pa bishita nan oficina riba e dia aki.  Bay goza di un dushi treat y cos di bebe, y captura e momento den nan area di recepcion bunita decora.

   Por pasa bishita nan awe entre 8:00 am y 12:00 pm, y for di 1:00 pm te cu 4:30 pm.