Awe mes Gobernador ta cuminza cu ronda di consulta

ORANJESTAD (AAN): Eleccion ta tras di porta y resultado ta conoci.  Pesey Gobernador di Aruba, Alfonso Boekhoudt lo start awe Dialuna

di mainta caba cu e rondanan di consulta cu organonan di conseho y cu lidernan politico.

   Durante di e rondanan di consulta, Gobernador ta informa su mes tocante e posibilidadnan pa formacion di un gabinete nobo, teniendo na cuenta e resultado di e eleccion pa miembronan di Parlamento di Aruba. Gobernador Boekhoudt primeramente lo papia cu presidente di Raad van Advies, señor Frits Goedgedrag y despues cu presidente di Parlamento, señor Juan Thijsen.

   For di Dialuna merdia Gobernador lo papia cu e lidernan di e partidonan politico cu a base di e resultadonan electoral preliminar a haya por lo menos un asiento: esta Evelyn Wever-Croes (MEP), Mike Eman (AVP), Ursell Arends (RAIZ), Marisol Lopez-Tromp (MAS) y Miguel Mansur (Accion21).

   Seguidamente Gobernador lo consulta cu presidente di Sociaal Economische Raad, esta  Tisa LaSorte, cu presidente suplente di Algemene Rekenkamer, Frederick Nuboer y cu e miembro postula pa Aruba di College Aruba financieel toezicht, Hellen van der Wal. E consultanan ta forma e comienzo di e proceso di formacion pa yega na un gobierno nobo pa Aruba. Ta spera cu e consultanan ta finalisa riba diaranson 30 di juni.

   E siguiente paso den e proceso di formacion ta cu, a base di e resultado di e consultanan, lo designa un informador y lo formula e encargo pa e persona en cuestion.