Awe Kanker Fonds Aruba ta riba caya pa colecta placa

ORANJESTAD (AAN): Ta fin di luna, prepara bo placa larga y asina duna un man pa yuda Kanker Fonds Aruba recauda fondo.

   Esey ta loke president Lilian Prins di Kanker Fonds Aruba a indica na DIARIO.  Awe Diasabra 2 di April, nan boluntarionan ta riba caya pa asina yuda recauda fondo.

   Tin di corda cu desde aña 2020, Koningin Wilhelmina Kanker Fonds no a colecta mas, pero e caosnan di cancer si a sigui subi.  Hopi ta esnan cu ta yega na porta pa solicita yudanza.  Pesey a pidi permiso pa asina awe Diasabra 2 di April nan ta riba caya pa colecta.

   Lo cuminza colecta for di 10:00 am, y ta sigui te cu 4:30 pm.  Esey ta debi cu tur hende kie rta na cas trempan, y nan por rond-af tur cos na tempo.

   E gastonan a sigui, y ta hopi agradecido cu e Fundacion semper a sa di traha cu e fondonan cu e ta colecta durante luna di April di tur aña.  Esey ta algo cu ta pasando di 1961 te cu awor.

   E pandemia di Covid-19 a stroba esaki na April 2020 y e colect no a socede e biaha ey.  Despues na April 2021 tambe a kere cu por a logra, pero debi na precaucion no a haci e colect.

   Pero awor na April 2022 si nan por, y nan tin un crew preparando pa di mainta caba ta ubica na diferente punto strategico na Oranjestad.  Lo bay haci esaki tur Diasabra di e luna aki (excepto Diasabra 16 di April cu ta Semana Santa).  Cada siman tin un distrito extra cu ta colecta hunto cu Oranjestad.

   E hecho cu tin un distrito extra yudando, lo bay pone e trabao den Kanker Fonds Aruba ta bay mas facil y mas rapido danki na esnan cu ta bay yuda.

   Kanker Fonds Aruba kier pa e boluntarionan bay cas trempan, basa riba e deseo di e organizacion pa adapta e sistema.

   Casonan di Cancer a sigui: Segun Lilian Prins, e casonan di Cancer cu ta wordo registra na Aruba a sigui.  Gastonan ta subi bay halto tambe.

   Awor cu ya AZV no ta paga pa un acompañante ta bay exterior, toch desde 2020 e isla aki mes tin su mesun radioterapia y esey ta un alivio pa pashentnan local.  Esey ta e motibo pakico awor e gastonan a sigui subi, y mester a adapta e servicionan tambe, principalmente e hecho cu pa 2 aña no tabata recauda fondo.  Pesey a baha y pone nan servicionan na pashentnan socede solamente Dialuna pa Diabierna.  Fin di Siman y Dia di Fiesta, e personal a keda liber.  Pero den caso di emergencia, nan tabata percura pa ta presente toch.

   Punto di Collect: Awe lo tin 3 punto sigur na Oranjestad unda nan lo ta colectando.  Den Caya Betico Croes (Caya Grandi), banda di Brug di Renaissance riba Boulevard, y na Plaza Daniel Leo.

   Di otro siman en adelante, lo tin varios Distrito cu ta haya turno y tin nan boluntarionan pa yuda colecta.