Despues di 39 aña e vision di cooperacion di Betico Croes ta realidad --- *Status Aparte Aruba na 1983 ta decisivo pa Reino Hulandes na 2022 --- *Awe Aruba ta “trekker” pa cooperacion nobo di Reino den Caribe
ORANJESTAD (AAN) — E realisacion di un Aruba autonomo den Reino Hulandes, a base di e diseño di Status Aparte introduci dor di Betico Croes, no tabata inspira pa un guera interno entre islanan Hulandes den Reino, pero riba kiebra di lazonan impone pa alcansa un relacion nobo cu un base boluntario pa cooperacion mutuo.
Den su prome declaracionnan despues di realisacion di Status Aparte pa Aruba, Betico Croes a splica su vision cu porta a habri pa un relacion y cooperacion nobo entre e islanan di Reino.
Na 2022, e buskeda di solucion financiero pa e paisnan autonomo di Reino Hulandes den Caribe, a haci cu Reino Hulandes a bolbe na e punto di salida di e Status Aparte propaga pa Betico Croes.
Tanto pa e hoben Arubiano como e Arubianonan cu por a lubida, nos mester bolbe un rato den historia di Antia Hulandes, cu a wordo forma unilateralmente dor di Madre Patria segun modelo colonial di e tempo.
Un modelo, cu a transforma e islanan Hulandes den Caribe riba tereno estatal, den comunidadnan completamente dependiente di Hulanda.
Un modelo, cu a causa friccion estatal entre e islanan den Caribe.
Ora na 1983 pues Reino finalmente a bay di acuerdo pa Aruba haya autonomia y goberna su mes como pais, uno di e prome reaccionnan di Betico Croes tabata, cu porta habri pa un relacion nobo entre e teritorionan Hulandes den Reino.
A base di e modelo di Aruba, den referendum Curacao y Sint Maarten tambe a dicidi pa Status Aparte, cu segun diferente historiador a haci cu mester reconoce Aruba como e pais cu a hunga e papel decisivo pa cambionan den e relacionnan estatal di Reino Hulandes.
Ora papia di autonomia, mester tene na consideracion e poder financiero di e pais pa para riba su propio pianan.
Si atrobe bolbe un rato den historia, ta topa cu e necesidad pa a crea economia y atende cu infrastructura di e paisnan.
Inventonan rapido di mundo moderno a exigi pa tin bon caretera, proyectonan di cas, aeropuerto y asina por sigui, cu tabata costa placa cu Hulanda mester a yuda pone riba mesa como ayudo pa desaroyo.
Despues di 2010 por nota cu Hulanda ta cuminsa exigi mas responsabilidad di e paisnan den Caribe pa e situacionnan financiero cu a presenta.
E paisnan tabata tin debe nacional considerabel, cu Hulanda a exigi pa atende.
Na 2017 ta topa cu situacionnan financiero inaceptabel pa paisnan autonomo na tanto Aruba, Curacao y Sint Maarten y Hulanda a institui medidanan.
For di 2018 e rapportnan di Reino tabata indica, cu Aruba a cuminsa atende cu mas responsabilidad manera rekeri dor di Reino.
Na varios ocasion Reino Hulandes mes a trece dilanti, cu Gobierno Evelyn Wever-Croes for di 2018 a adapta sistemanan pa reduci debe y aumenta entrada pa asina na 2020 por a yega na un presupuesto cu no tabata tin mester di sosten di Hulanda.
For di e tempo, Hulanda a admiti cu Gobierno Wever-Croes tabata haci esfuerso pa soluciona e problemanan, cu a bira un calamidad ora Covid-19 a bati na porta.
Mientrastanto, por a mira un desaroyo sumamente importante, cu ta hiba nos atrobe na e vision di Betico Croes, di cooperacion entre e paisnan autonomo den Reino.
Siman pasa, e cuatro paisnan cu ta forma Reino Hulandes, a cuminsa papia di e buskeda di solucionnan definitivo pa COHO, cu ta e organo pa desaroyo y reforma di e paisnan.
Atrobe Aruba a sobresali y e paisnan den Reino a bay di acuerdo pa Aruba bira “trekker”, cargado pues portador di e solucion no solamente pa Aruba pero pa tur pais di Reino den Caribe.
Nos mester yega na un conclusion. E vision di Betico Croes na 1983, a bira realidad na 2022, ora e paisnan autonomo di Reino den Caribe a entrega na Prome Ministro di Aruba, Mr. Evelyn Wever-Croes, e tarea di trekker di e proyecto nobo, di cooperacion nobo di paisnan den Reino Hulandes.
Mester conclui cu na e momentonan aki, despues di 39 aña, e proceso cu Betico Croes tabata tin na vista pa Status Aparte, ta wordo conclui den buskeda di un relacion y cooperacion nobo y liber den Reino.
Un cooperacion cu mester pone e paisnan riba e caminda real pa autonomia, cu ta encera un epoca nobo di maneho financiero responsabel cu ta e exigencia mas grandi di autonomia.
